ANG piniliay pagka-presidente sa Philippine Councilor’s League (PCL) sa Bohol sama sa usa ka away tali sa karon ug sa nangaging mga presidente sa pundok sa mga magbabalaod sa kalungsuran ug dakbayan.
Opisyal nga mideklarar sa ilang kandidatura si incumbent PCL president Konsehal Jescelo Adiong sa Loay ug kanhi presidente sa kahugpungan Konsehal Gloria Gementiza sa lungsod sa San Isidro atol sa regular session sa Tagbilaran City Council sa nakalabay nga huwebes.
Silang Gementiza ug Adiong mibisita sa SP sa dakbayan isip kabahin sa ilang kampanya sa dili pa ang piniliay nga ipahigayon karong martes Hulyo 26 ngadto sa 27 diha sa Bohol Tropics Resort ning syudad.
Samtang, si Tagbilaran City Councilor Jonas Cacho nga una nang mipahibawo sa iyang tinguha sa pagkapresidente ang niatras sa maong piniliay.
Si Cacho niingon nga si Gobernador Aris Aumentado, iyang ig-agaw, nihangyo kaniya nga kanselahon ang iyang kandidatura.
Wa na niya ipasabot kon nganong nihimo og apela si Aumentado, apan si Gementiza maoy gilantaw nga kandidato sa hepe ehekutibo batok kang Adiong, kinsa nidagan kaniadto uban sa bug-at nga suporta ni kanhi gobernador Art Yap ug kanhi bise gobernador Rene Relampagos.
Sa Provincial Board (PB), diin nilingkod si Adiong isip ex-officio member tungod sa iyang pagka-presidente sa PCL, usa siya sa mga magbabalaod sa oposisyon nga kasamtangang nagdominar sa legislative body sa gidaghanon, walo ngadto sa lima.
Sa iyang pakigpulong, si Gementiza mikuwestiyon sa kakuwang sa transparency ni Adiong sa pagdumala sa panalapi sa PCL.
Matod niya usa lang ka financial report ang gipagawas ni Adiong sa iyang tulo ka tuig nga termino.
Sa iyang bahin, si Adiong niingon nga nagtinguha siya nga magpapili pag-usab aron mapadayon ang mga programa nga iyang nasugdan sa iyang pagkalingkod.
Si Gementiza niingon nga kompleto na ang iyang slate samtang si Adiong niingon nga wala pa niya mahuman ang iyang line-up diin 300 ka mga konsehal sa Bohol ang mipasalig sa nahauna nga anha mobotar.
Ang PCL adunay 482 ka miyembro lakip na ang 386 ka regular nga miyembro 96 ka ex-officio member. (RTB)
