MOKABAT sa 287 ka opisyal ug empleyado sa kagamhanan sa lungsod sa Candijay ang nipaubos sa surprise drug testing niadtong Lunes Hulyo 18, 2022 isip kabahin sa drug-clearing drive sa Philippine Drug Enforcement Agency (PDEA) sa mga siyudad ug lungsod.
Matod sa hepe sa Candijay police nga si Major Gerald Luna, naapil sa drug testing ang local government unit (LGU) ug national government agencies sa maong lungsod.
Giapil sa maong drug test si Mayor Thamar Olaivar ug uban pang mga napili nga opisyal diin ang testing gihimo sa municipal gym human sa flag-raising ceremony sa LGU.
Matod ni Luna nga sila lang ni Olaivar ang nahibawo sa random testing nga gipasiugdahan sa PDEA.
Ang mga resulta alang sa mass testing wala pa ipagawas diin kadtong magpositibo mag-atubang og reklamong administratiba ug kriminal.
Ang mga kaswal nga empleyado mahimo usab nga mag-atubang dayon sa pagtangtang sa serbisyo sa gobyerno. (RTB)
