SEGUN sa Sulat ni San Pablo ngadto sa Taga-Efeso 6:10-19 nga gitawag og Taming Sa Dios o God’s Armor, tataw nga kita mismong nga magtutuo gipadala ngadto taliwala sa gubat (spiritual warfare) batok sa mga ispirituhanong kaaway. Giawhag kita pagdawat ug pagsul-ob sa taming nga makapanalipud kanato. Angay kitang magsul-ob sa taming sa kamatuoran, pagsalig sa Dios, og sa kahibalo nga si Kristo mag-ayo sa atong mga sakit. Ang bugtong hinagiban nga atong gihuptan mao ang espada sa ispirituhanong pagtimbangtimbang, pagtimbangtimbang segun sa Pulong ni Kristo. Apan wala kita awhaga pagdaut o pag-atake sa atong mga kaatbang. Ang atong papel ning maong gubat mao ang pagpanalipud lamang, antuson ang mga atake, ug magpabilin pagbarug.
Sa pagsul-ob ning maong taming giawhag kita nga dili ipasiatab ang atong mga hinagiban. Giawhag hinuon kita nga mamahimong sakuban sa pagpanalipud nga magsabwag sa kalinaw. Kining maong kalinaw motuhop ngadto sa dalan nga atong pagalakwan ning kalibutan. Kining maong kalinaw maoy mahimong tinubdan pinaagi kanato og kita mahimong mga mensahero sa maayong balita gikan sa ginharian sa mga angheles. Matud pa ni Adam Bittleston:
“Taliwala sa kasamuk ning atong panahon
Kinahanglang ang way katapusang Kalinaw sa Pulong sa Dios atong paminawon.
Pagkaplag sa Kalinaw pinaagi sa tibuok tang pagkalalang
Latas sa dalan nga mobiya sa way hunong nga kagubot ug damgong makalilisang,
Paingon sa ginharin sa kalangitan
Ngadto sa Amahan natong tanan—
Didto si San Miguel atong ikasugat
Pinaagi kaniya si Kristo atong mahimamat
Ang tawo niini mahigmata
Ug pagsilbi sa Dios maoy iyang himaya.”
Daghang salamat kang Adam Bittleston sa iyang mga balak nga nag-ulohan, Mga Pamalandong karong Adlawa, ug kang Cindy Hindes sa iyang pagsangyaw.
