SUBAY sa tumong ug tuyo sa Additional Funds (AF) nga gitanyag sa kagamhanan pinaagi sa Kapit Bisig Laban sa Kahirapan, Comprehensive Integrated Delivery of Social Services (KALAHI CIDSS), mahimo na nga magamit ang usa ka isolation facility nga gitukod gamit ang nasampit nga pundo, didto sa lungsod sa Batuan.
Segun pa sa mga tinugyanan sa Department of Social Welfare and Development nga maoy gitugyanan sa pagdumala sa pundo sa KALAHI, gitugot lamang ang dugang pundo (additional funds) kon kini gastohon alang sa pagpugos sa katalagman ug pagpakunhod sa epekto niini sa komunidad.
Nahukman sa mga katawhan sa Batuan nga magtukod sila og usa ka Isolation Facilty nga may 16 ka lawak ug kini nagkantidad og P9.6 milyones, agi og kabahin sa disaster response ug recovery sa lungsod.
Subay gihapon sa lagda sa paggamit sa pundo, gipaagi sa saktong proseso subay sa Disaster Response Operations Modality ang pag-implementar sa proyekto nga nahimutang sa Poblacion Sur, sa nahisgutang lungsod.
Gidonar usab sa Department of Education ngadto sa katawhan sa Batuan ang luna nga gutukoran sa nasampit nga facility.
“Ang amoang partnership with LGU Batuan usa ka simbolo sa tinud-anay nga demokrasya. Kining isolation facility, bunga kini sa paglambo sa among katawhan, dayag pa ni Marcel Dapar, DepEd Supervisor ug BDC-TWG Head sa KALAHI-CIDSS in Batuan.
Hinuon, kanunay na nga gipasabut sa DSWD nga dili ang pundo maoy ilang gipakadak-an sa proyekto.
Ang pagpakat-on sa katawhan aron sila magamhan sa mga saktong buhaton sa pagpili sa unsay angayan ug labing gikinahanglan sa pundo nga magamit, ang paglili sa desinyo ug ang pagseguro sa pagmonitor sa katukoran niini ug ang pagbaton sa tukma nga katakus sa pagpalahutay sa nahisgutang pasilidad, dili ikatumbas sa minilyon nga gigasto sa kagamhanan alang sa ilang pasilidad, pasabot ni Leah Quintana, didto sa Regional Information Officers Briefing sayo niining buwana didto sa Blue water Resort sa Panglao.
“Ang pag-empower sa among mga tawo dinhi sa Batuan sama sa pag-involve kanila sa implementasyon, operasyon, ug pag-mentenar sa maong proyekto maoy labing dako nga kalambuan ang gihatag niini sa among gamay nga lungsod, matud pa ni Mayor Atty. Antonio M. Jumawid.
Ang paghatag og kapasidad sa atong komunidad samtang gipatuman nila ang proyekto daku na kayo nga monumento sa kaugmaran sa atong katawhan sa Batuan, dugang sa Mayor. (rahc/PIA_7/Bohol)
