ANG hunahuna sa tawo mahimong makaayo o makadaut kaniya. Unsay buot ipasabut niini? Di ba makalibug?. Atong tugkaron pinaagi sa usa ka pananglitan.
Si Gina gi-hold up/gitulis usa ka gabii niana samtang naglakawng nag-inusara sa usa ka dalan nga way suga, napulo na ka tuig kanhi ang milabay. Karong bag-o nadawat siya sa trabaho pagka-call center agent og gi-assign nga magsilbi panahon sa kagabihon. Bisag mahimo na siyang mouli inigka-kaadlawn, siya magdumili pag-uli ug anha na lang matug sa iyang lamesa, usahay gani adto sa kasilyas, tungod kay wa na siyay kaisug paglakawng mag-inusara sa kalsada.
Ang nahitabo kaniya napulo ka tuig kanhi sigeg balik-balik sa iyang hunahuna sama sa usa ka gubang plaka. Sige niyag hunahunaon. Ang iyang mga ginikanan ug higala mitabang kaniya aron makat-on og martial arts iyawat maprotektahan niya ang iyang kaugalingon. Apan mao gihapon ang resulta, dili siya kasugakod paglakawng mag-inusara bisag hayag ang suga sa kalye.
Kasagaran kini nahitabo kanato, lakip na kining inyong maglilindog. Ang usa ka yanong pagsaway lang sa imong kauban sa trabaho mahimong makasamuk na sa imong hunahuna sulod sa dugayng panahon bisag dugay na kining nahitabo. Ilabi na kon imong ikatagbo ang maong tawo, mosurok ang imong dugo ug kalit lang mamalik ang dautang pagbati. Subo kining palandungon apan tinuod.
Ang maayong balita mao kini. Mahimo nato kining usbon. Kini mga hunahuna lamang, bunga sa paghinuklog ug wa nay lain pa. Posibleng nahimo na kining naandan. Apan mahimo kining ilisdan sa lain ug mas maayong mga hunahuna. Unsaon? Adunay gitawag og, tulo ka bulawanong kamatuoran sa kinabuhi. Una, ikaw kanunayng maghunahuna. Ikaduha, ang imong hunahuna nahilambigit gayud sa imong pagbati ug askyon daw sama sa kaluha. Ug ikatulo, mahimong imong usbon ang imong pagbati ug aksyon pinaagi sa pagpakalma sa imong hunahuna ug paghulip niini sa mga positibo ug maayong hunahuna. Kinahanglan kining tun-an ug bansay-bansayon.
Kinahanglang makat-on kita sa halawom nga pagpamalandong. Mag-ampo ta sa kanunay matag-buntag ug gabii. Himoon kining maoy naandan. Dili kinahanglang mogastog mahal. Bisitahi diha sa Internet ang www.wccm.org sa World Community for Christian Mediation. Dili kini atong inimbento. Kining maong mga maayong hunahuna hinulaman lamang nato gikan kang Fr. Bede Griffiths, Fr. John Main, Sydney Banks, Siddharta Gautama, Judith Sedgeman, ug uban pa. Hinaut nga makatabang kini kanimo.
