MGA opisyal sa agrikultura dinhi sa kabisay-an misuporta sa hukom ni president elect Ferdinand Marcos Jr. nga maoy modumala sa Department of Agriculture (DA) sa iyang paglingkod pagka presidente. Usa na niini si DA Assistant Secretary Salvador Diputado.
Gidayeg ni Diputado ang personal nga pagdumala ni President-elect Ferdinand ‘Bongbong’ Marcos, Jr. sa Departamento sa Agrikultura (DA) sugod sa Hulyo 1, 2022.
Si Diputado nagkanayon nga sa paglingkod unya ni Marcos, makabaton na og labing dako nga pundo ang DA para sa mga mag-uuma.
Matod pa nga ang DA adunay P91 bilyones nga approved budget gikan sa gipangayo nga P231 bilyones alang sa tuig 2022.
Ang assistant secretary sa DA kinsa maoy nakatutok sa Visayas, nagkanayon nga adunay mga hagit sa pagdumala unya ni Marcos apan kini masulbad ra kon adunay political will.
Ang incoming president miingon nga grabe ang problema sa agrikultura hinungdan nga iya kining pangunayan sa pagtutok.
Tuyo sa umaabot nga presidente nga mabalik ug mapalambo ang maong departamento.
Subay usab niini, si OIC provincial agriculturist sa Bohol Dr. Larry Pamugas naglaom nga mahatagan og pagtagad sa umaabot nga administrasyon ang mga mag-uuma.
Matod niya nga luoy ang mga mag-uuma karong panahona nga nagmahal pag-ayo ang abuno ug ang krudo nga gamiton sa makinarya sa panguma. (RTB)
