GIBUTYAG sa opisyal sa Inauguration Committee ni Governor-elect Erico Aristotle “Aris” C. Aumentado nga nagpadayon pa ang ilang pagpangandam sa mga kalihukan sa umaabot nga Inauguration Day sumala sa giplanohan.
Si Mr. Metodio “John” Maraguinot Jr., tsirman sa nasangpit nga komitiba niingon sa usa ka pakighinabi ning pamantalaan nga ang pagpanumpa ni Aumentado ug uban pang mga piniling opisyal sa probinsiya ipahigayon sa Bohol Cultural Center sa Tagbilaran City karong umaabot Hunyo 30, 2022, petsa nga gihatag sa balaod.
Ang tema sa inaugural karong tuiga mao ang “Abante Bohol: Limpyong Panggobyerno, Kalamboan sa Tanang Bol-anon” (Forward Bohol: Clean Government, Development for All Boholanos).
Gisulti usab niya ang lainlaing mga kalihokan nga ipahigayon sa nahisgutang petsa. Una sa listahan mao ang Inaugural Mass sa alas 7:15 sa buntag sa St. Joseph the Worker Cathedral-Parish diin si Bishop Alberto Uy maoy mag-unang magsaulog, uban ni Fr. Efren Bongay ug Fr. Adonis Hubac isip concelebrants.
Ang ‘Swearing-in Ceremony’ ipahigayon gikan sa alas 10:00 ngadto sa 11:30 A.M., nga pagasundan sa Inaugural Luncheon diin ang kalihokan pinaagi lamang sa imbitasyon (By invitation) tungod sa limitado nga lugar ug ang pagdili ubos sa COVID-19 health protocol ug naka i-stream kini online pinaagi sa social media.
Human sa paniudto, si Aumentado, kauban si Vice Governor-elect Dionisio Victor Balite, Provincial Administrator-designate Asteria Caberte, ug ang bag-ong napiling mga sakop sa Sangguniang Panlalawigan (SP) mangulo sa Wreath-Laying Ceremony sa CPG Monument atubangan sa Bag-ong Kapitolyo sa probinsya.
Ang pagpirma sa executive issuance isunod dayon sa Gobernador’s Office, diin usa ka media briefing ang gikatakda nga himuon.
Sila si Aumentado ug Balite maoy mo-host sa ‘Abante Bohol Business Dialogue’ sa Modala Beach Resort sa Panglao, diin gikatakdang motambong ang mga business personality gikan sa Bohol ug sa ubang bahin sa nasod u gang mga pahibalo bahin sa inagurasyon igahatag kanunay hangtod sa Hunyo 30.
Gipasabot ni Maraguinot nga usa kini ka inagurasyon sa katawhan ug ang mga Boholano maoy mag-una sa tanang pag-organisa.
“Pinaagi sa inaugural nga mga kalihokan, nanghinaut kita nga masugdan ang atong hiniusang lakang sa unahan, nga gimaneho sa atong hiniusang tinguha ug pangandoy sa pagwagtang sa korapsyon, pagsilsil sa maayong pagdumala, ug pag-una sa kaayohan sa mga Boholano,” sigon niini. (RTB)
