UPAT ka provincial road sa Bohol ang nahimo nang national road gumikan sa pagpaningkamot ni 3rd district Congw. Alexie B. Tutor.
Kini suma pa sa Department Order No. 109, Series of 2022, Pursuant to the provision of Sec.5, Item 1 of E.O 124.
Ang maong mga kalsada mao ang Dimiao-Bilar (Dimiao – Oac, Bilar Jct. Road), Hinawanan – Calunasan Norte Road (Hinawanan, Loay – Concepcion – Calunasan Norte, Loboc), Katipunan, Alicia – Mahayag, San Miguel Jct. Road ug Gabayan, Candijay – Canawa – Inaguban, Pilar Jct.
Gumikan niini, mahimong prayoridad sa national funding kining mga national road pinaagi sa DPWH isip implementing agency.
Sa laing bahin, na-turnover na ang P5M kantidad sa Covered Court didto sa Bulawan, Mabini ubos sa liderato ni Brgy. Capt. Alejo Tutor.
“Salamat gyud ninyong tanan sa inyong nagpabilin na bulawan sa gugma, suporta ug pagsalig kanako. Mag uban ta kanunay para mag uban ta sa kaugmaran sa brgy. Dili mo undang ang kumbati sa pag serbisyo,” matud pa kang Congw. Alexie Besas Tutor.
Laing turn-over ceremonies usab ang gipahigayon didto sa Gotozon, Loboc alang sa bag-ong Brgy. Hall nga nagkantidad P5M.
“At long last duna na gyuy nindot na Barangay Hall sa Gotozon. Maayo pagka plastar, hawan ang tugkaran, duol sa eskwelahan. Welcome ang katawhan mo bisita ug mosulod niini. Ampingi kini arun mapahimuslan pa sa atong mga sumusunod nga mga lideres. Sa atong panaghiusa natagamtam nato ang legasiya para sa tanan,” pamahayag pa sa kongresista sa Tersiero Distrito. (Kahlil Lester O. Camba)
