NIINING nihapsay na ang abog sa eleksiyon, si Kongresista Edgar Chatto niingon nga panahon na sa pagtrabaho ug pagpadaplin una sa politika.
“Nahuman na ang eleksyon. Manarbaho sa ta,” matod ni Chatto sa local media nunot sa pagpanumpa sa mga bag-ong napiling opisyal sa lungsod sa Dauis kaniadtong Lunes, Hunyo 20.
Matod ni Chatto, kinahanglang magkahiusa ang mga piniling opisyal sa pagtrabaho alang sa kalamboan sa Bohol.
Matod niya nga kanunay siyang nakigtambayayong sa ubang mga opisyal bisan unsa pa ang ilang kalambigitan sa politika.
“Nakahibaw man ang mga Bol-anon na ingon ana akong attitude sukad sauna wa man mausob hantod karon. Bisag unsa na grupo, basta mahuman na ang election, trabaho na ta,” matod sa kanhi gobernador.
Si Chatto niingon nga siya manumpa sa iyang katungdanan uban sa uban pang mga piniling opisyal sa lalawigan sa Bohol Cultural Center karong Hunyo 30.
Si Chatto, kinsa kaalyado ni outgoing Governor Art Yap, maoy bugtong labing taas nga opisyal nga dili sakop sa politikanhong koalisyon sa umaabot nga administrasyon.
Ang grupo ni Gobernador-elect Aris Aumentado hapit hingpit nga gibanlas ang “Padayon Bol-anon” ni Yap ug Relampagos diin si Aumentado ug iyang running mate nga si Dionisio Victor Balite sa “Abante Bohol” mipildi kanila.
Sa laing bahin, sila Rep. Alexie Tutor ug Vanvan Aumentado, parehong kandidato ubos sa Abante Bohol, nidaog sa pagka kongresista sa ikatulo ug ikaduhang distrito.
Si Chatto na lang ang nahabilin nga napiling opisyal sa gitawag nga “triumvirate” sa mga kadagkoan sa politika nga gilangkoban nila ni Yap ug Relampagos.
Sila si Yap ug Relampagos 12 ka sunod-sunod nga mga tuig diha sa katungdanan sa wala pa mapildi sa 2022 nga eleksyon.
Si Chatto, sa laing bahin, wala pa gyud mapildi sa usa ka eleksiyon sukad sa unang pagdaog sa elective post niadtong 1989 isip mayor sa Balilihan.
Nagsunod-sunod na ang iyang mga katungdanan sama sa pagka Provincial Board member, bise gobernador, gobernador ug kongresista sukad niadto. (RTB)
