PANAHON sa pagpangampanya, gibandera ni outgoing Second District Representative ug karon incoming Governor Aris Aumentado ang paghatag og seryosong pagtagad sa Tubig ug Kuryente sa lalawigan sa Bohol — nga maoy dugay na kaayong problema dinhi.
Kining maong pangandoy duol na kaayo sa katumanan kay siya na man ang molingkod nga gobernador sa Bohol.
Ang Bohol nga gipaak og ayo sa pangil sa COVID-19 ug napun-an sa bangis nga bagyong Odette, mas nanginahanglon og klaro nga mga programa ug proyekto nga haum sa panginahanglan sa katawhan ug sa probinsya.
Si Aris sa usa ka interbyu sa radyo niingon nga anaay upat ka suliran sa Bohol nga iyang unahon sa pagtagad: turismo, agrikultura, kuryente ug serbisyo sa panglawas.
Sa hisgutanan sa turismo, nikunhod kini pag-ayo panahon sa pandemya sa COVID-19 ug nisamot sa dihang gitamparos sa kusog kaayong bagyo nga si Odette, nga nagbilin og dagkong danyos nga konektado sa panginabuhian sa katawhan.
Niingon si Aris nga iyang pangusgan ang “agri-tourism” ilabina sa Segundo Distrito nga iyang gustong mahimong “farm tourism destination capital” dinhi sa Bohol.
Sa kuryente nga maoy dugay nga hagulgol sa mga Bol-anon ilabina human sa Odette nga nitaas ang bayrunon niini sa mga konsumidor, niingon ang outgoing congressman nga nakig-istorya na siya og mga investors aron moanhi sa probinsya aron mangita og yuta nga katukuran sa ilang planta.
Nipasalig usab si Aris nga iyang ipa-review kon giunsa pagproseso ang pag-bidding sa pagbutang og land-based power supply dinhi sa Bohol.
Sa agrikultura, makighinabi si Aumentado sa taga-National Irrigation Administration (NIA) aron masuta ang gipangbiyaan nga mga proyekto sa mga kontraktor aron mapadali ang paghuman sa mga proyekto sa patubig.
Nakigtambayayong usab siya sa NIA ug Department of Agriculture (DA) aron matutokan pag-ayo ang patubig sa mga basakan sa probinsya.
Ipasusi ug patun-an usab niya ang pagpaubos sa presyo sa isda ug ubang nag-unang pamaliton dinhi sa Bohol nga dugay ng yangungo sa katawhan tungod sa kamahal o bulawan nga presyo.
Atong hinumduman nga panahon sa mga krisis o kalisdanan ilabina kon atakihon sa mga kalamidad, mahal ang presyo sa mga pagkaon ug lisod ang pagpangita niini. Daghang magutman ilabina kon kuwang sa supply.
Sa health services, ni-insister si Aris nga kinahanglan mahatagan og sayon nga pag-access sa pagpa-ospital ang katawhan.
Sa iyang mga Facebook posts, makita usab nga nagkighinabi kini sa mga higanteng negosyante sama sa SM, Robinson, ug uban pa aron mo-abli og negosyo dinhi nga siguradong makamugna og daghang trabaho nga makatabang usab sa ekonomiya sa Bohol.
Ang nakanindot, matud pa ni Aris, kay “consultative ug participative governance” ang iyang administrasyon ilawom sa adbokasiya nga limpyong pang-gobyerno ug unahon ang interes sa mga Bol-anon.
Consultative, pasabot maminaw kini sa katawhan ug sa iyang mga advisers ilabina sa mga economic advisers.
Participative, pasabot anaay papel ang katawhan sa pagpadagan sa Bohol, kay dili kaya sa gobyerno kon walay abag sa katawhan.
Makita ang katarong sa gobyernong Aumentado sa iyang giplastada nga mga programa.
Kon suportahan sa katawhan ug saligan sa mga investors, mosutoy sa taas ang ekonomiya sa Bohol ug kini mo-reflect usab sa pamuyo sa katawhan ilabina sa mga kabus.
Ana-a ang pagsalig sa katawhang Bol-anon nga ang administrasyong Aumentado makahatag og hayag nga kaugmaran sa Bohol.
Kay matud pa, “Basta Aumentado, Serbisyo de Kalidad ug Sigurado!”
Kining lindog: ‘Tingog sa Kabatan-onan’, abli sa inyong mga sugyot ug komento. Mamahimo kana ninyong mapaabot pinaagi niining akong numero 09638753562 o Gmail: subriowilsonauguis@gmail.com o sa Facebook ug Messenger account: Wilson Auguis Subrio.
Modawat lamang og seryoso ug dili binuang. Mag-amping kita, mga Bol-anon!
