MIPASIDAAN ang Bohol Light Company Incorporated (BLCI) sa mga konsumidor sa syudad sa Tagbilaran alang sa posibleng pagsaka sa singil sa ilang bills karong Hulyo hangtud Agosto tungod sa taas nga generation rates.
Ang pagsaka sa singil sa kuryente nagagumikan sa pagsaka sa presyo sa lana ug cola sa world market.
Matud pa mosaka og P0.39/kWh ang singil karong bulan sa Hulyo ug Agosto nga billing period. Ang presyo sa lana ug coal sa world market nagsugod og saka niadto pang Enero ning tuig.
Tungod kay kadaghanan sa mga power generators naggamit man niini, misaka sab ang gastos sa pagpadayon sa ilang operasyon hinungdan sa pagpataas sa singil sa kuryente o Wholesale Electricity Spot Market (WESM) gikan sa P10 kutob P12.
Dili lang kini nasinati dinhi sa Bohol kon dili hasta sab sa Luzon ug Minadano diin dunay gisunod nga WESM.
Aron dili modako ang bill, gitambagan sa BLCI ang mga konsumidor nga ibton ang linya sa kuryente kun dili gamiton ug kondisyonon ang mga aircondition units, electric fans ug uban pa aron dili kini mokaon og dakong konsumo sa kuryente. (RTB)
