DILI na pugos sa usa ka estudyante nga motambong sa face-to-face classes (F2F) nga magkuha og medical insurance nga maglakip sa mga galastohan sa pagpatambal kon ugaling masakit sa coronavirus disease (COVID).
Kini human gipagawas sa National Inter Agency Task Force on the management of Emerging Infectious Diseases sama sa COVID, ang Resolution No 168-B series of 2022, nga nagpawalay-gahum sa nahauna nga Department of Health ug Commission on Higher Education Joint Memorandum Circular No. 2021-004 (DEPED-CHED JMC No. 2021-004).
Kahinumduman nga gipagawas sa duha ka nahisgutang ahensya ang JMC No. 2021-004 niadtong Disyembre 15, 2021 isip nasudnong sumbanan sa pagpatuman sa limitado nga F2F classes sa mga Higher Educational Institutions (HEI) nga kasamtangan pang may Alert Levels batok sa COVID.
Segun sa nahisgutang JMC, ang tanang HEI nga naa sa COVID Alert Level 1 ug 2, magpasugod sa ilang limitadong F2F classes sa Disyembre 2021, samtang ang tanang HEI nga anaa sa Alert Level 3, magsugod sa ilang limitadong F2F classes sa Enero 2022.
Gawas nga gimandu sa JMC nga kadto lamang mga bakunado nga teaching ug non-teaching personnel sa mga HEI ang tugotan nga maghimo sa F2F, ug tambagan ang mga may daan nang gipamating sakit, sobra sa 60 anyo o mabdos sa pagpili na lang sa work from home nga pamaagi aron kalikayan ang sakit, tinguhaon usab sa mga tunghaan ang dugang pagpanalipod sa mga motambong sa klase around dili hingtakdan.
Mga bakunado lang usab nga mga estudyante ang tugotan sa pag-apil sa F2F, ug kadtong may comorbidities, tambagan nga sa sunod na nga mga semester moenrol, aron maiway sa sakit.
Dili man pugos ang HEI sa pagpatuman sa F2F, segun sa JMC, mahimo gihapon sa HEI nga mopili sa JMC No 4, series of 2020 o kadtong giya alang sa Flexible Learning.
Nunot usab niini nga mga palisiya nga gipatuman sa JMC aron dili maglisud ang estudyante sa iyang panginahanglang pinansyal kon ugaling matakdan, una na nga gipangayo nga ang mga moapil sa F2F classes, kinahanglang may insurance nga mag-apil sa pagpatambal batok sa COVID.
Apan sa labing bag-ong liskuhag sa sitwasyon, namatikdan sa CHED nga mahimong dili na kinahanglan pa nga pugson ang estudyante sa pagkuha sa insurance nga may COVID treatment coverage.
Pinaagi sa nahisgutang Resolusyon No-168-B, gipawalay gahum na sa NIATF ang JMC No. 2021-00f ilabi na ang Section 4-F o kadtong nangayo og insurance coverage sa COVID gikan niadtong estudyante nga moapil sa F2F classes.
Ang nahisgutang Resolusyon sa IATF, gipagawas niadtong Mayo 26, 2022. (rahc/PIA-7/Bohol)
