WALA kuno’y tawo nga talawan kon mapuno na — nahutdan o mahutdan na sa iyang pasensya, ilabina kon nasakitan na og ayo.
Sa akong nasinati kaniadto, motuo ko niini.
Anaay uban kanato nga talawan apan kon maupos na gani ang pasensya, anha na mogawas ang kaisog nga gitaguan sama sa nagpahiping leyon.
Sa atong katilingban, daghang maldito sa ilang pagkatawo ug abusado sa gahom.
Anaay uban nga kusog kaayo manglookdown sa ilang isig-ka-tawo ilabina kon ikaw o ako — kita pobre.
Anaay uban usab nga puno sa mga insecurities. Daling masuya sa kalampusan sa uban o kon unsay ana-a nila.
Ang uban usab dili gustong malabwan sa utok o diskarte ilabina kon adunahan o impluwensyado unya ang nilabaw nila kabus o ordinaryo ra.
Ikaw, nakasuway na ba ka nga gidaug-daug sa ubang tawo ilabina sa inyong silingan, kauban sa trabaho, classmates o mga pulitiko?
Ana-a gayuy mga tawo nga ilang kalipay ang atong kaalautan o kahuyang. Ilang hagakgak kon makita kitang naglisod o makaluluoy.
Daghang makarelate niining maong mga pananglitan ilabina sa atong mga kaigsoonang kabus.
Bisan kon ikaw usa ra ka yano nga lumulupyo diha sa inyong komunidad, ayaw tan-awa ang imong kaugalingon nga usa ka makaluluoy.
Kon wala kay gihimong dautan sa ubang tawo o tarong ang imong panginabuhian o trabaho, ayaw kana ikauwaw.
Ayaw paabusar sa uban ilabina sa mga adunahan ug gamhanan nga mata-pobre o ubos ang pagtan-aw sa dili nila ka-level sa pamuyo.
Kon ikaw walay nahuman nga kurso o elementarya o high school ra kutob, dili kana makapahat sa imong maayong pagkatawo. Pagbuhat lang gayud sa kon unsa’y sakto ug makatarunganon.
Ug sa kanunay nakong giingon, ayaw patamak aron dili ka balik-balikan og tamak.
Kon mosukol na ang mga dinaug-daug, minus ang inhustisya.
Kon mosukol na ang mga dinaug-daug, dali ang pagkab-ot sa hustisya. Anaay mga masilutan subay sa lagda sa mga balaod.
Ug kon mosukol ang mga dinaug-daug, ana-a ang paglaum nga anaay kahapsay ug kalinaw sa atong katilingban.
Kining lindog: ‘Tingog sa Kabatan-onan’, abli sa inyong mga sugyot ug komento. Mamahimo kana ninyong mapaabot pinaagi niining akong numero 09638753562 o Gmail: subriowilsonauguis@gmail.com o sa Facebook ug Messenger account: Wilson Auguis Subrio.
Mudawat lamang og seryoso ug dili binuang. Mag-amping kita, mga Bol-anon!
