EGO trip.
This is how the Cebuanos consider SILG Eduardo Año’s recent action against the EO of Governor Gwen Garcia that makes the wearing of face masks optional in well-ventilated areas or outdoor.
Daghan kaayong nalipay sa gihimo ni Gov Gwen kay hinay-hinay nang nakalingkawas ang mga Sugbuanon sa kalisod sa COVID.
Sa kadugayon nga pag-agwanta sa COVID, duna na gyod pod nakat-onan ang mga Sugbuanon kon unsaon nila paglikay ang pagkuyanap sa COVID.
Wa man magpasabot nga dili na magsul-ob og face mask.
Gihimo lang optional, pasabot, gihatag na ngadto sa katawhan ang paghukom kon mag-face mask ba o dili kon anaa sila sa gawas og wala maghuot ang mga tawo.
* * *
Padung na siya pulihan kay aduna na may gitudlo si BBM nga maoy magdumala sa DILG.
Buot ipasabot, tamjun ra ni si Año, o taman ra sa Hunyo 30.
Inig ka Hulyo, wala na na siya og mahimo na lang nga sibilyan.
Angay unta nga sa nahibiling pipila ka adlaw, dili na siya mangaway, dili na siya mag-ego trip ug dili na niya hadlokon ang iyang mga sakop.
Tiaw bay gi-relieved niya si PD Col Engelbert Soriano tungod lang kay nagpadayag si Soriano sa iyang pagtuo nga mentras wala pa hukmi sa korte nga sayop ang EO ni Gov Gwen, angay kini nga respetohan.
Sa akong nahibaw-an, adunay gihimo nga sulat si Gov Gwen nga nagkwestiyon sa pag-relieved ni Soriano, unsa may hinungdan nga gi-relieved man?
* * *
Duna pod ubang mga dagkong opisyal nga naghimo pod og susama sa gihimo ni Año.
Padung na pulihan og hangtod na lang sila sa Hunyo 30 pero nakaako pa og panghulga sa ilang mga sakop.
Gusto nila nga hangtod sa kinataposang adlaw sa ilang pag-alagad, ilhon gihapon sila nga maoy labaw ug ang ilang gusto ang angay tumanon sa mosunod kanila sa ilang posisyon.
Susmariosep.
* * *
Mora’g kapit tuko.
Mogunit gyod sa pwesto ug dili gusto mamuhi bisan nasayod na sila nga pulihan gyod kay lain na sab ang magdumala.
Mora bitaw og tuko nga hilabihan makapilit, dili gyod mahulog o matangtang bisan imong birahon.
Ingon ani ang gihimo sa maong mga opisyal bisan nasayod na silang daan nga kutob ra ang ilang pag-alagad sa termino sa nagtudlo kanila.
Dili gusto mohawa. Mona-mona intawong hangyo nga ipabilin sila sa pwesto kay nasayod sila sa solusyon sa problema sa nasod.
Bahala’g usa ka tuig lang nga extension, basta lang ma-extend kay aron kuno mahuman nila ang ilang mga programa.
Grabe oi, lupig pay tuko lagi.
* * *
Balik ta sa gibuhat ni SILG Año.
Gitagaan niya og tulo ka adlaw aron usbon ang ordinansa nga gipagawas sa lalawigan sa Sugbo.
Apan gisumbalik siya ni Deputy Speaker PJ Garcia nga tagaan siya og tulo ka adlaw aron usbon ang iyang gisulti. Human sa gamay nga lecture bahin sa gahom sa mga LGU ubos sa Local Government Code, gihagit ni Cong PJ si Año nga mopasaka og kaso sa korte kon nagtuo siya nga nakalapas sa balaod ang maong ordinansa.
Maayo unta og dawaton ni Año ang hagit ni Cong PJ og mopasaka kini og tukmang kaso.
Maila gyod og unsay kalibre aning tawhana.
* * *
Dunay mga tawo nga hilabihan kaayo maka-abiba kay taga-BBM kuno sila.
Hilabihan pod mangaway. Grabe og tirada pirmi.
Ang rason pod sa ilang pagsuporta kay dunay gusto pangayoon inig kahuman sa piniliay. Dunay gusto pangayoon nga posisyon, og mao kana ang hinungdan nga hilabihan maka-abiba.
Ang problema kay human sa piniliay og nahibaw-an na ang midaog, maglisod na man sila og sulod sa linya.
Di na man tubagon ilang text messages ug calls. Dili parehas sa una nga abtik pas kilat makatubag ang taga-HQ. Pero karon, mayna lang og dunay reply, bisan K na lang.
Unsay pasabot ana?
* * *
Wa ko magtuo nga nakalimtan na sila.
Ang akong pagtuo, nagduda ang HQ sa ilang loyalty mao nga dili kaayo sila ganahan nga motagad. Og mao kini hinungdan nga gipasagdan na lang ang ilang mga text ug tawag nga way motubag.
Luoy laman.
Grabe ra ba manghambog nga inig ka daog sa ilang manok, dako gyod sila og tingog para sa ilang pangayoon.
Apan naunsang pagka-unsaa nga mingaw pas tirana man hinuon ang resulta.
* * *
Nakasulay baya pod ko sa una og tabang sa kampanya, panahon ni PRRD kaniadtong 2016.
Makasuklat nga problema gyod adtong panahona pero laban lang gihapon og tuod man, dako gyod kaayo og boto si PRRD sa Bohol.
Wala pod ko moapil sa mga naglumba pag-adto sa Davao aron mo-apply kay adtong panahona, wa pod koy plano mosulod sa gobierno.
Pero wala tuyoa, nagkita mi ni PRRD ug SBG didto sa SM Lanang og sa way pagduha-duha, makalingaw nga offer ang ilang gihimo, unsay imong gustong posisyon? Gibalik pa gyod og, unsay gusto nimo nga posisyon sa gobierno?
Aguy Noy.
Na-amang pa bitaw ko, hahahaha.
Ang akong ipasabot, basta makita lang nila sa mga bossing nga tinud-anay gyod ka mitabang nila, dili gyod ka kalimtan.
Tuod man, sa dihang nag-dinner mi ni PRRD sa Malacañang kauban ang akong idol nga si Atty. Victor de la Serna ug uban pa, gibalik pagsulti ni PRRD nga usa ray iyang pangayoon gikan nako, loyalty lang ug likay sa pangurakot.
