GIPASIUGDA ni Department of Health (DOH) Secretary Edwin Mercado ang pagpadako sa katakos sa mga ospital nga gidumala sa mga lokal nga kagamhanan, isip tubag sa nagpadayong problema sa pagkapuno sa mga pasyente — lakip na dinhi sa Gov. Celestino Gallares Memorial Medical Center.
Nahitabo kini human makita ug gitubag ni Mercado ang ulohan nga gipagawas sa *The Bohol Chronicle* sa isyu niadtong Nobyembre 1, 2026 kabahin sa maong kahimtang sa nasangpitong ospital, diin iyang gipaambit kini pinaagi sa iyang Facebook account.
Sumala sa kalihim, gikinahanglan nga mapalig-on ang mga pasilidad ubos sa pagdumala sa mga LGU ug mahimong mas tin-aw ang pamaagi sa pagpadala ug pagbalhin sa mga pasyente tali sa mga ospital sa LGU ug sa mga sakop sa DOH. Ang tumong niini mao ang pagsiguro nga ang matag pasyente madala sa lugar nga haom sa matang sa pag-atiman nga ilang gikinahanglan.
Gipasabot usab ni Mercado nga mao kini ang sukaranan sa gitawag nga Healthcare Provider Network nga gilatid sa Universal Health Care (UHC) Law — aron mas tarong, mas paspas, ug mas sakto ang paggamit sa atong mga kahinguhaan sa panglawas.
Dugang pa, nahibaloan nga personal nang nakigkita si Bohol Governor Aris Aumentado kang Secretary Mercado aron mangayo og direktang tabang alang sa dinaliang solusyon sa sitwasyon sa Gallares Hospital. (RTB)
