GIDUSO ni Department of the Interior and Local Government (DILG) Secretary Jonvic Remulla ang paggamit sa 911 isip hiniusang emergency hotline sa Bohol, samtang mipasalig nga motabang sa pagpagawas sa nalangan nga Special Allotment Release Order (SARO) alang sa mga programa ug proyekto sa ikaduha ug ikatulong distrito sa lalawigan.
Gihimo ni Remulla ang maong mga pahayag atol sa iyang pagbisita sa Bohol niadtong Oktubre 15, 2026, dungan sa pagtugyan sa 50 ka Unified 911 Emergency Response Motorcycles ngadto sa mga municipal police station.
Partikular nga gihangyo ni Remulla si Gobernador Aris Aumentado nga ipuli ang 911 sa kasamtangang TaRSIER 117 emergency hotline, subay sa paningkamot sa DILG nga mahiusa ang mga numero sa pagtawag alang sa emerhensiya sa tibuok nasud.
Matud sa kalihim, pinaagi sa usa lamang ka numero, gilauman nga mas sayon ug mas paspas nga makapangayo og tabang ang publiko gikan sa mga otoridad ug emergency responders kon adunay emerhensiya.
Gipasalamatan ni Aumentado ang nasudnong gobyerno sa maong mga motorsiklo, nga iyang gihulagway nga dakong tabang sa pagpalig-on sa sistema sa pagtubag sa emerhensiya ug sa pagsiguro sa kaluwasan sa mga lumulupyo ug bisita.
Sumala sa gobernador, misaad usab si Remulla nga dugangan pa ang mga ambulansya ug mga trak sa bombero aron mas mapalig-on ang kahandaan sa mga lungsod sa Bohol.
Gipasiugda ni Aumentado nga ang Bohol, isip UNESCO Global Geopark ug usa sa mga nag-unang destinasyon sa turismo sa nasud, kinahanglan adunay andam ug paspas nga pagtubag sa bisan unsang insidente.
Gipasalamatan usab niya si Remulla, Philippine National Police Chief Gen. Jose Melencio Nartatez Jr., ug Bureau of Fire Protection Chief Supt. Wilberto Rico Neil Kwan Tiu sa ilang pagtambong sa turnover.
Gipasiugda sa gobernador nga ang serbisyo publiko kinahanglang ihatag nga walay pagpihig o pagtagad sa politikanhong kolor. Gipasalig usab niya nga andam ang kagamhanang probinsiyal nga makigtambayayong sa tanang ahensya aron mas mapalig-on ang mga komunidad ug ang ilang kahandaan sa panahon sa panginahanglan.
Sa bahin sa pondo, gitumong sa pasalig ni Remulla ang mga programa ug proyekto nga naghulat pa sa SARO sa ikaduhang distrito, nga girepresentahan ni Rep. Vanessa “Vanvan” Aumentado, ug sa ikatulong distrito ni Rep. Alexie Tutor.
Sa iyang pakigpulong sa mga mayor, gibutyag ni Remulla nga nakigsulti na siya sa Executive Secretary ug kang Presidente Ferdinand “Bongbong” Marcos Jr. aron hangyoon nga mapagawas ang alokasyon alang sa maong mga programa ug proyekto.
Matud ni Remulla, nasabtan niya ang kalisod nga giatubang sa mga politiko nga dili kaalyado sa kasamtangang administrasyon tungod kay nakaagi usab siya sa susamang kahimtang sa panahon nga gobernador pa siya sa Cavite.
Sumala ni League of Municipalities of the Philippines (LMP)-Bohol President ug Carmen Mayor Che-che Delos Reyes, gikatakdang makigkita pag-usab ang mga mayor sa ikaduha ug ikatulong distrito kang Remulla aron mangayo og endorso ngadto sa Malacañang alang sa pagpagawas sa maong alokasyon.
Gipaningkamotan sa mga mayor nga mapagawas ang SARO samtang nagkaduol ang kataposan sa tuig, aron mahatagan og pagtagad ang mga programa ug proyekto nga naghulat pa sa pondo. (RTB)
