HINGPIT nang milarga ang katapusang biyahe sa Philippine AirAsia gikan sa Bohol-Panglao International Airport padulong sa Manila kaniadtong Setyembre 30. Ang Flight Z2353, nga gigamit ang Airbus A320-214 nga adunay rehistrasyong RP-C8979, milarga sa alas 8:46 sa buntag.
Gipasabot ni CAAP Bohol Manager Anghelo Ibañez nga ang temporaryong paghunong sa maong ruta tungod sa nag-usab-usab nga presyo sa sugnod ug kahimtang sa kalibutan nga nakaapekto sa tibuok industriya sa paglupad.
Sumala sa pahayag sa Philippine AirAsia, gihimo kini isip kabahin sa kinahanglang paghan-ay sa ilang operasyon aron mohaum sa kasamtangang kahimtang sa industriya.
Giklaro usab nga dili pa kini permanente — gitawag kini nga temporaryong pagsuspinde, busa nagpabilin ang paglaum nga mobalik ang serbisyo sa umaabot nga panahon.
Bisan pa man, ang paghunong sa maong ruta magdala og pagkunhod sa kasayon sa pagbiyahe tali sa Bohol ug Manila, ilabina sa mga pasahero nga kanunay nagasalig sa AirAsia isip ilang sakyanan sa paglupad. (RTB)
