GIPASIDAN-AN sa Bohol Provincial Disaster Risk Reduction and Management Office (PDRRMO) ang tanang lumulupyo ug lokal nga kagamhanan nga mangandam sa mas dugay ug grabeng uga nga panahon gumikan sa nagkakusog nga El Niño — nga posibleng mosangpot sa tinuod nga hulaw o drought sa Marso 2027.
Matud ni PDRRMO Chief Anthony Damalerio, kinahanglan nang molihok daan ang probinsya aron mapakunhod ang kadaot sa mga panimalay, umahan, ug kinaiyahan.
Gipaabot nga Kahimtang sa Panahon — PAGASA: Oktubre–Nobyembre 2026: mokunhod ang ulan (below-normal rainfall); Disyembre 2026: magsugod ang uga nga kahimtang; Enero–Pebrero 2027: dry spell — mas mamala ug mas init; ug Marso 2027 pataas: posibleng mosulod sa drought stage — dugay ug grabe nga hulaw.
Mga Posibleng Epekto: Mokunhod ang tubig sa mga dam, suba, ug tinubdan — makaapekto sa suplay sa panimalay ug irigasyon; Mokunhod ang ani sa agrikultura; posibleng mawad-an og tanom ang mga mag-uuma; Maglisod ang mga kahayopan sa kainit ug kakulang sa tubig; Mas daghang masakit gumikan sa sobrang kainit; ug Motaas ang paggamit sa kuryente; mas dako nga risgo sa sunog sa kalasangan ug sagbotan.
Mga Lakang sa Gobyerno: Pagpanalipod sa tinubdan sa tubig ug pagpangita og dugang paagi sa pagtipig niini; Pagtabang sa mga mag-uuma pinaagi sa mga pamaagi nga haom sa uga nga panahon; Pagbantay sa kahimsog sa publiko; ug Pagmonitor sa mga lasang ug dapit nga tinubdan sa tubig.
Giawhag ang tanang Bol-anon nga magtipid sa tubig ug kuryente, ug kanunay nga mosubay sa mga opisyal nga pahibalo sa panahon gikan sa PAGASA ug sa PDRRMO. (RTB)
