NAKATALA ang probinsya sa Bohol og ₱14.3 milyones nga halin sa tulo ka adlaw nga 37th Philippine Travel Mart (PTM) 2026 — nagpamatuod sa padayong dakong interes sa probinsya isip sikat nga destinasyon sa turismo, luyo sa mga hagit sa ekonomiya karong tuiga.
Gipahigayon ang maong kalihokan niadtong Setyembre 4 hangtod 6 sa SMX Convention Center sa Pasay City, Metro Manila, ubos sa temang: “Nurturing the NextGen Tourism: Discover Your Philippines.”
Pinaagi sa Bohol Provincial Tourism Office (BPTO) ug Department of Tourism (DOT) Region VII, gipasigarbo sa Bohol ang mga nindot nga destinasyon, talagsaong kasinatian, kultura, ug mga inisyatiba alang sa malungtarong turismo ngadto sa mga biyahero ug mga partner sa tibuok nasud.
Ang nakolektang halin nga mokabat sa ₱14.3 milyon nagpakita sa lig-on nga panginahanglan sa merkado alang sa Bohol. Gipasiugda usab nga importante ang pagsiguro sa maayong kasinatian sa mga bisita aron mapalig-on ang ilang pagsalig ug madasig sila nga mobalik pag-usab.
Samtang nangandam ang probinsya alang sa kampanyang “Visit Bohol 2027”, ang Kagamhanang Probinsyal ubos sa pagdumala ni Gobernador Erico Aristotle Aumentado padayong nakigtambayayong sa mga ahensya ug komunidad aron masulbad ang mga hagit ug mapadayon ang turismo isip nag-unang tinubdan sa panginabuhian sa probinsya.
Ang partisipasyon sa PTM nagpalig-on usab sa pag-ila sa Bohol isip bugtong UNESCO Global Geopark sa Pilipinas — diin naghiusa ang pagpanalipod sa kinaiyahan, pagpasigarbo sa kultura, ug pagpalambo sa kinabuhi sa mga lumulupyo. (RTB)
