GIDUSO ni Gobernador Aris Aumentado ang tumong nga himoon ang Bohol isip “Dairy Capital of the Visayas”, pinaagi sa mas lapad nga lokal nga produksyon, pagdani sa dugang mga mamuhunan, ug padayong suporta sa kagamhanan alang sa paglambo sa industriya sa gatas.
Gipahayag kini sa gobernador atol sa pagsaulog sa Ika-10 nga Bohol Dairy Festival sa President Carlos P. Garcia Multi-Purpose Center sa Talibon niadtong Miyerkules, Agosto 26. Matod niya, ang unang napulo ka tuig sa maong selebrasyon nakatukod na og lig-on nga pundasyon aron mahimong usa sa mga nag-unang tighimo og gatas sa tibuok rehiyon ang Bohol.
Ang tumong sa probinsya mao ang pagkab-ot sa kaugalingong katagbawan sa suplay sa gatas, samtang ang industriya naghatag og dugang panginabuhian sa mga mag-uuma ug negosyante ug nagpalig-on sa sektor sa agrikultura.
Nanawagan si Gov. Aumentado sa mas hugot nga panaghiusa tali sa mga ahensya sa kagamhanan, mga mag-uuma, kooperatiba, ug pribadong sektor aron mapalapad pa ang produksyon. Giawhag usab niya ang mga kabatan-onan nga mosulod niini isip panginabuhian, ug ang pagbansay sa mga propesyonal nga maoy mangulo sa industriya sa umaabot.
Gihangyo usab niya ang nasudnong kagamhanan og dugang suporta ilabina sa pondo ug mga proyekto, samtang gipasalig nga andam ang Kagamhanang Probinsyal nga gamiton ang tanan nga kapanguhaan aron matuman ang tumong. Ang paglambo sa industriya sa gatas kabahin sa mas lapad nga plano sa probinsya — ang pagpalambo sa modernong agrikultura nga haum sa pagbag-o sa klima.
Ang selebrasyon gipahigayon ubos sa tema nga: “Unang Dekada sa Panaghiusa: Pundasyon sa Malungtarong Panggatasan, Lig-ong Panginabuhian, ug Maayong Nutrisyon sa Kabataan.”
Gitambongan kini sa mga opisyal sa nasudnong ug lokal nga kagamhanan, mga mag-uuma, negosyante, ug mga representante gikan sa Department of Agriculture, National Dairy Authority, Philippine Carabao Center, ug ni Bise-Gobernador Nicanor Besas. (RTB)
