VALENCIA, BOHOL – Gisugdan niadtong Agosto 29, 2026 ang groundbreaking sa FY 2026 PAMANA Water System Project sa Barangay Maubo, Valencia, Bohol, nga gitumong sa paghatag og mas kasaligan, luwas ug lig-on nga suplay sa tubig sa mga komunidad sa kabukiran.
Gipangunahan ang kalihokan ni Mayor Engr. Dionisio Neil A. Balite, JD, PhD, Vice Mayor Aristotle Cometa, ug Office of the Presidential Adviser on Peace, Reconciliation and Unity (OPAPRU) Secretary Mel Senen S. Sarmiento, uban sa presensya ni Bohol Police Provincial Office Director PCol. Patricio Degay Jr., mga opisyal sa militar, barangay officials ug mga residente.
Ang Maubo Cluster Water Project adunay kantidad nga ₱10 milyon, nga hingpit nga gipondohan sa OPAPRU ubos sa PAMANA program. Target nga mapahimuslan niini ang mga komunidad sa Maubo, Marawis, Botong ug Anonang, nga mokabat sa 635 ka mga panimalay.
Kabahin kini sa Valencia Integrated Upland Water Supply and Watershed Protection Program (VIUWSPP), nga nagtutok dili lamang sa pagpatukod og water system, apan apil usab ang malungtarong pagdumala ug pagpanalipod sa mga watershed ug tinubdan sa tubig.
MAYOR NEIL: DILI LANG INFRASTRUCTURE
Sa iyang mensahe, giingon ni Mayor Balite nga espesyal ang maong okasyon tungod kay dili lamang sila nag-groundbreaking alang sa laing imprastraktura, kundili alang sa usa ka butang nga “essential to life itself — water.”
Matud pa sa mayor, usa sa dakong hagit sa mga upland barangay ang kakulang sa igo, luwas ug kasaligan nga suplay sa tubig. Tungod niini, iyang gipasiugda ang pagpalambo sa VIUWSPP aron maprotektahan ang mga tinubdan sa tubig ug watershed samtang gitukod ang mas integrated nga water system alang sa mga komunidad.
Gipasalamatan usab ni Mayor Balite si Sec. Sarmiento sa ₱10-milyong pondo, nga iyang giingong dakong oportunidad aron sugdan ang pagpatuman sa ilang water-security vision alang sa Valencia.
Gihisgutan usab sa mayor nga kaniadto iyang professor si Sec. Sarmiento sa Development Academy of the Philippines (DAP) diin ilang gitun-an ang paghimog mga solusyon ug inobasyon alang sa mga problema sa lokal nga panggobyerno.
Matud ni Mayor Neil, makahuluganon nga karon si Sec. Sarmiento miabot sa Valencia dili na isip professor nga nagtudlo sulod sa classroom, kondili isip partner sa pagpatuman sa mga prinsipyo sa good governance.
“Sir Mel, welcome to my classroom today. This time, my classroom is Valencia. And our lesson is how good governance can bring water to our people,” matud sa mayor.
Gihangyo usab ni Mayor Balite ang pakigtambayayong sa mga residente sa Maubo sa pagpanalipod sa mga kalasangan, springs, recharge areas ug watershed, tungod kay matud pa niya, dili igo ang imprastraktura lamang aron masiguro ang suplay sa tubig sa umaabot.
Sa iyang mensahe, iyang gipasiugda nga ang proyekto kinahanglan mahimong sinugdanan sa mas dakong commitment sa pagpanalipod sa watershed, pagsiguro sa water security ug pagsiguro nga walay komunidad sa Valencia nga mabiyaan tungod sa kakulang sa tubig.
Sa iyang bahin, gipasiugda ni Sec. Sarmiento nga ang panaghiusa sa katawhan ug mga opisyal sa usa ka lugar importante aron mas mapaspas ang kalamboan ug mas epektibong matuman ang mga proyekto nga direktang makabenepisyo sa komunidad.
Gilauman nga ang ₱10-milyong proyekto makatabang sa pagpausbaw sa kahimsog, panginabuhian ug kalig-on sa mga upland communities sa Valencia. (Adrian Tagupa)
