NIBUBO og ₱4.53 bilyon nga puhonan ang nagdumala sa Bohol-Panglao International Airport (BPIA) alang sa tibuok nga pagpaayo ug modernisasyon sa tugpahanan. Tumong niini — makadawat kini og mas daghang pasahero ug makatugpa na ang mas dagkong eroplano.
Ang Aboitiz InfraCapital Bohol Airport Corp. (ABAC), nga nagdumala sa tugpahanan ubos sa 30 ka tuig nga kasabotan tali sa kagamhanan ug pribadong sektor, mipahibalo nga igahin ang pondo alang sa padayon nga pagpalambo, pag-ayo, ug pag-upgrade sa tanang pasilidad ug serbisyo sa umaabot nga mga tuig.
Gipakita sa ABAC ang ilang mga nahimo ug mga plano ngadto sa mga opisyal sa Department of Economy, Planning and Development (DEPDev) atol sa ilang pagbisita ug tigom sa mismong tugpahanan.
Matod ni Bohol-Panglao International Airport General Manager Aldwin Uy, ang kasamtangang trabaho nagtutok sa pagpaayo sa mga importanteng kahimanan, aron mas kasaligan ang operasyon ug mas nindot ang serbisyo sa mga pasahero.
Lakip na sa nahimo: naibalik sa maayong kondisyon ang mga elevator, giayo ang mga tagadala sa bagahe o carousel, ug gimentinar kanunay ang mga tulay ngadto sa eroplano o boarding bridge aron masiguro nga hapsay ug luwas ang pagbiyahe. Gisusi usab ug gihimo nga kasaligan ang suplay sa kuryente o UPS, gimentinar ang mga timbangan, gidugangan ang mga lingkuranan, gipanindot ang mga karatula, ug gibansay ang mga empleyado sa hustong pag-atiman ug pag-abi-abi sa mga pasahero.
Gipalambo usab ang kapasidad sa tugpahanan aron makatugpa na ug makalupad ang mas dagkong eroplano sama sa Airbus A330. Matod sa ABAC, dakong tabang kini aron mabuksan ang mas daghang bag-ong biyahe ug mas sayon ug paspas ang pag-abot sa mga bisita dinhi sa Bohol.
Sukad gisugdan sa ABAC ang pagdumala sa BPIA niadtong Hunyo 2025, mokabat na sa kapin 2.16 milyon ka pasahero ang niagi, niabot, ug mibiya gikan sa maong tugpahanan. (RTB)
