GIPASALIG sa Department of Health Central Visayas (DOH-7) ug Bohol Provincial Health Office nga ang bakuna batok sa tipdas ug rubella (MR vaccine) luwas, epektibo, ug dugay nang nasulayan. Kini gipahayag atol sa gihimong press briefing niadtong Agosto 13, subay sa nagpadayong kampanya nga “Ligtas Tigdas 2026: Measles-Rubella Supplemental Immunization Activity (MR-SIA)”.
Ang maong pahayag gihimo nila Dr. Van Philip Baton, Hepe sa DOH-7 Logistics Support Division, ug Dr. Fruserma Mary Uy, Bohol Provincial Health Officer.
Matod ni Dr. Baton, ang MR vaccine dili bag-o — lima ka dekada na kining gigamit sa tibuok kalibutan ug mao gihapon ang bakuna nga gigamit sa naandan nga programa sa pagbakuna sa nasud. Daghan pa gani sa mga hamtong karon ang nakadawat na niini sa dihang mga bata pa sila.
Ang bakuna nakapasar sa tanang sumbanan ug gisuportahan sa World Health Organization (WHO) ug Food and Drug Administration (FDA). Gipasalig usab ni Dr. Uy nga ang bakuna luwas, nasulayan, ug napamatud-an na.
Nagsugod ang kampanya niadtong Agosto 10 ug nagtumong sa tanang bata nga 6 hangtod 59 ka bulan ang edad. Sa ika-upat nga adlaw niadtong Agosto 14, mokabat lamang sa 9,000 ka mga bata o 7.4 porsyento sa tumong nga 100,000 ang nabakunahan. Ang DOH nagtinguha nga maabot ang labing menos 95 porsyentong sakop aron masiguro ang igong proteksyon sa mga bata.
Giawhag sa duha ka opisyal ang mga ginikanan nga mohukom base sa siyensya ug kamatuoran, dili sa kahadlok o sayop nga impormasyon nga mikatag sa social media. Mokonsulta lamang sa mga awtoridad sa panglawas ug mga doktor, ug dad-on dayon ang mga anak sa mga sentro sa pagbakuna. (RTB)
Nag-awhag usab si 1st District Board Member Mutya Kismet Tirol Macuno, usa ka pediatrician ug vice-chairman sa Komite sa Panglawas sa Sangguniang Panlalawigan sa tanang ginikanan sa Bohol nga ipabakuna ang ilang mga anak batok sa tipdas (measles) ug rubella.
Gipasiugda niya ang pag-endorso sa “Ligtas Tigdas 2026: Measles-Rubella Supplemental Immunization Activity (MR-SIA)”, ug gipasalig nga ang MR vaccine luwas, nasulayan, ug napamatud-an sa siyensya — mga dekada na kini gigamit ug dugay nang gitun-an, busa dili angay kahadlokan.
Base sa iyang daghang tuig nga kasinatian isip doktor sa mga bata, miingon si Macuno nga wala pa siya makasinati og seryosong epekto gikan sa maong bakuna sa iyang mga pasyente.
Gipasabot usab niya nga mas dako ang katalagman sa mga batang wala mabakunahan: mas dali silang matakdan sa tipdas nga mahimong mosangpot sa seryosong komplikasyon sama sa pneumonia, ilabi na sa mga batang ubos ang resistensya. Ang pagbakuna mao ang pinakamaayong paagi aron mapanalipdan ang mga anak.
Gipahimangnoan usab ang mga ginikanan nga ayaw motuo sa mga bakak ug wala mapamatud-ang impormasyon batok sa bakuna nga mikatag sa social media. Giawhag sila nga mosalig lamang sa kasaligang impormasyong medikal ug siyentipikong pagtuon sa paghimo og desisyon.
Gihulagway pa ni Macuno ang bakuna isip usa sa labing dakong nahimo sa siyensya, tungod sa dakong papel niini sa pagpugong sa mga sakit nga malikayan pinaagi sa pagbakuna. (RTB)
