NAHIMUTANG sa pinakaubos nga rehiyon sa tibuok nasud ang Central Visayas sa pag-uswag sa kampanya sa pagbakuna batok sa tipdas ug rubella. Sa Bohol, mokabat lamang sa 7.4 porsyento o 9,000 ka mga bata ang nabakunahan sa ika-upat nga adlaw niadtong Agosto 14, gikan sa tumong nga 100,000 ka mga bata.
Matod ni Dr. Van Philip Baton, Hepe sa DOH-7 Local Support Division, mas hinay ang pag-uswag sa Central Visayas kumpara sa ubang rehiyon nga apil sa “Ligtas Tigdas 2026: Measles-Rubella Supplemental Immunization Activity (MR-SIA)”. Mas taas ang gidaghanon sa namakunahan sa Rehiyon 1, 2, 3, ug Bicol Region — bisan pa man nga naapektuhan kini sa baha ug dili maayong panahon.
Sa Bohol, gikinahanglan nga makabakuna og aberids nga 10,000 ka bata kada adlaw sulod sa 20 ka adlaw aron maabot ang tumong. Ang kampanya nagtumong sa tanang bata nga 6 hangtod 59 ka bulan, lakip na kadtong nabakunahan na kaniadto.
Gipahayag ni Dr. Baton nga makapaalarma ang hinay nga dagan, kay ang DOH nagtumong sa labing menos 95 porsyentong sakop aron masiguro ang igong proteksyon sa mga bata batok sa tipdas ug rubella.
Giawhag niya ang mga ginikanan nga dad-on ang ilang mga anak sa mga sentro sa pagbakuna, ug mohukom base sa siyensya ug kamatuoran — dili sa kahadlok o sayop nga impormasyon. Gidasig usab sila nga mosalig lamang sa mga pahayag gikan sa mga awtoridad sa panglawas ug mga propesyonal sa medisina. (RTB)
