TUNGOD sa gugma ug pagsakripisyo sa atong mga apuhan kaniadto, 124 ka tuig na ang nakalabay karong adlawa nga gideklarar ang atong Kaugalingnan.
Dili sayon ang ilang mga lakang aron lang ang mga henerasyon nga musunod makabaton og Kagawasan.
Kinabuhi, oras, pamilya ug mga kabtangan maoy ilang gihalad alang sa nasud Pilipinhon… alang sa mga Pinoy.
Ang kakuwang sa puwersa ilabina sa mga armas wala nahimong babag sa ilang pagsukol batok sa mga Katsila.
Bisan anaay mga panagbangi kaniadto sa atong mga lider, nahitabo gihapon ang Rebolusyon aron makabaton og tarong, maayo ug patas nga pang-gobyerno ug makagawas sa pagka-ulipon.
Apan karon, makaingon ba kita nga gawasnon kita kon ang China unanay nga naghari-hari sa usa ka kabhang sa atong giampingang teritoryo?
Ang atong kasamtangang pinakataas nga lider lahi og baruganan. Ana-a ang pagsaway nga “talawan” kuno.
Ang tinuod nga lider mudepensa sa iyang katawhan ug sa yutang natawhan, kutob sa iyang makaya.
Ang pagbarog sa atong katungod nga depensahan ang atong nasud usa ka matang sa dayag nga pagka-nasudnon.
Ang dakong pangutana: gawasnon ba kita kon mismo ulipon kita sa kaugalingong mga lider sama sa mga abusado, kawatan ug korap?
Labaw niini, gawasnon ba kita kon hangtud karon ana-a pa ang insurhensiya ug hulga sa terorismo?
Gawasnon ba kita kon mismo atong mga kaliwat nanggiunay?
Ang klaro, independente kita sa dokumento apan dili sa reyalidad. Independente ra kita isip usa ka nasud apan dili kita makasulti nga hingpit ang atong kagawasan.
Kon ana-a ang patas nga pang-gobyerno, kon ana-a ang patas nga pagtratar sa mga kabus, kon ana-a ang patas nga pamalaud ug timbang nga hustisya, kon ana-a ang kalambuan ug kauswagan.
Ug kon ana-a ang malahutayong kahapsay ug kalinaw, anha kita makaingon nga ana-a na kita’y kagawasan ilabina kon ana-a ang panaghiusa ug pagtinabangay.
Dinhi sa Bohol, nahimo kitang ulipon sa mga abusadong lider ilabina sa mga lider nga dili “pure Bol-anon” ug “dili gayud Bol-anon”.
Dili na kita musugot nga kita mahimong talawan sa atong kaugalingong lungsod o probinsya tungod sa mga hulga nga gikan mismo sa mga naglingkod sa gobyerno.
Kon gihagit ang atong kagawasan nga musulti sa tinuod, sukol kay kita anaay mga katungod.
Hangtud kita muduko sa mga diktador nga lider, taphaw ang atong kagawasan nga gisaw-an.
Dili kita magpakahilom basta ana-a sa sakto. Hinumdomi, dili kita ulipon sa atong yutang natawhan. Ayaw pagpakaulipon!
Happy 124th Independence Day sa tanan! Mabuhay!
Kining lindog: ‘Tingog sa Kabatan-onan’, abli sa inyong mga sugyot ug komento. Mamahimo kana ninyong mapaabot pinaagi niining akong numero 09638753562 o Gmail: subriowilsonauguis@gmail.com o sa Facebook ug Messenger account: Wilson Auguis Subrio.
Mudawat lamang og seryoso ug dili binuang. Mag-amping kita, mga Bol-anon!
