GIPAKITA usab sa Probinsya sa Bohol ang padayon nga dedikasyon sa pagpalambo sa kahimsog ug nutrisyon atol sa pagtapos sa ika-52 nga Nutrition Month niadtong Hulyo 31, diin mitambong ang dul-an sa 200 ka mga trabahante sa panglawas, mga BNS, BHW, ug ubang adbokado.
Sa mensahe ni Vice Governor Nick Besas, gipahinumdoman ang tanan nga ang saktong nutrisyon ug himsog nga pamaagi sa kinabuhi magkinahanglan og panaghiusa sa tanan. Gipasalig usab sa administrasyon ang padayon nga paggahin og pundo alang sa mga programa sa panglawas.
Sumala sa Provincial Health Office Head nga si Dr. Fruserma Mary Uy, ang Bohol nagpabilin nga Green Banner Awardee sulod sa tulo ka sunod-sunod nga tuig, ug gilauman nga madawat na ang prestihiyosong Nutrition Honor Award karong bulana sa Agosto. Matud pa niya, ang tinuod nga kadaugan mao ang hingpit nga pagwagtang o pagpaubos sa lebel sa malnutrisyon sa probinsya.
Gidasig usab sa mga representante sa Department of Agriculture ug Department of Education ang pagpalit sa mga produkto sa lokal nga mag-uuma, paglikay sa pagsayang sa pagkaon, ug ang kahinungdanon sa nutrisyon aron molampos sa pag-eskwela ang mga bata. Gitapos ang kalihokan pinaagi sa mga kompetisyon sama sa Nutri-Quiz, pagdibuho, pagluto, ug pag-awit ug pagsayaw nga adunay kalabotan sa nutrisyon.
Ang duha ka dagkong kalihokan nahiuyon sa Strategic Governance Roadmap sa probinsya isip unang UNESCO Global Geopark sa nasud nga nagatutok sa kaayohan ug proteksyon sa katawhan. (RTB)
