OPISYAL nang nakuha sa Petron Corporation ang kontrata alang sa pagdesenyo, pagtukod, pagpadagan, ug pagdumala sa bag-ong ₱340-milyon nga Jet A-1 fuel farm sa Bohol-Panglao International Airport (BPIA). Kini aron mapalapdan ang kapasidad sa pasilidad ug matubag ang padayon nga pagdako sa gidaghanon sa mga biyahe sa maong tugpahanan.
Sumala sa Aboitiz InfraCapital Bohol Airport Corp. (ABAC), ang operator sa BPIA, napili ang Petron isip labing angay nga kauban human sa estrikto nga proseso sa kompetitibong ebalwasyon ubos sa Request for Proposal (RFP). Ubos sa kasabutan, eksklusibo ang Petron sa pagdumala sa on-site fuel depot nga gikatakdang mahuman sa ikatulo nga kwarter sa tuig 2027.
Ang pasilidad adunay tulo ka tangke nga makakarga og 477 kiloliters matag usa. Sa pagkakaron, mokonsumo ang tugpahanan og aberids nga 102 kiloliters matag adlaw — 43 kiloliters para sa internasyonal ug 59 kiloliters para sa lokal nga biyahe. Sa higayon nga mahuman, makahatag kini og suplay nga igo na sa labing menos lima ka adlaw nga konsumo.
Gipasabot ni Aldwin Uy, General Manager sa ABAC, nga ang proyekto nagpakita sa dedikasyon sa pagpauswag sa serbisyo sa tugpahanan: “Pinaagi sa pakigtambayayong sa usa ka lider sa industriya sama sa Petron, among gisiguro ang usa ka lig-on ug world-class nga pasilidad nga motubag sa nagtubo nga panginahanglan sa paglupad sa Bohol.”
Gipasalig usab ni Jonathan F. Del Rosario, Bise Presidente sa Petron, nga ang tibuok pagtukod ug operasyon mosunod sa pinakabag-ong sumbanan sa Joint Inspection Group (JIG) aron masiguro ang kaluwasan ug kalidad sa suplay sa gasolina.
Aron mapanalipdan ang patas nga kompetisyon, ang singil sa paggamit sa pasilidad pagadumalan gihapon sa ABAC aron walay diskriminasyon sa ubang supplier sa umaabot. Nagporma na usab ang kompanya og lokal nga grupo sa Tagbilaran aron sigurohon nga mahuman ang proyekto sa gitakdang panahon. (RTB)
