GIDAGSA sa mga Bol-anon ang pormal nga paglunsad sa gipalapdan nga “Benteng Bigas Meron Na” o P20 Rice Project didto sa Plaza Rizal, isip kabahin sa nasudnong Rice-for-All Program sa Department of Agriculture.
Gipadayon kini sa Kagamhanan sa Probinsya pinaagi sa Office of the Provincial Agriculturist aron masiguro nga adunay barato ug de-kalidad nga bugas nga maabot sa mga pamilyang nanginahanglan ug sa mahuyangong sektor sa katilingban.
Sugod niadtong 2025 nga nagsugod ang programa nga naglangkob lamang sa pito ka lokal nga panggamhanan, karong tuiga gipalapdan na kini sa tanang 47 ka lungsod ug usa ka dakbayan sa Bohol. Adunay gikatakdang ₱24 milyon nga pondo alang sa implementasyon, nga gilauman makabenepisyo sa dul-an 120,000 ka lumulupyo—lakip ang mga pobreng pamilya, senior citizens, tawo nga may kakulangan sa lawas, solo parents, ug mga lumad nga katawhan.
Aron masiguro ang kanunay ug igo nga suplay, mipirma og Memorandum of Agreement (MOA) ang Kagamhanan sa Probinsya ug ang Food Terminal Incorporated (FTI). Ang kasabutan gipirmahan ni Gobernador Aris Aumentado ug ni FTI President ug CEO Joseph Rudolph Lo, nga gisaksihan nila Provincial Administrator Asteria Caberte, Provincial Agriculturist Liza Quirog, DA Assistant Secretary Atty. Genevieve Velicaria-Guevarra, ug National Food Authority Administrator Dr. Larry Lacson.
Matod sa kagamhanan, ang inisyatiba nagtumong sa pagpalig-on sa kasegurohan sa pagkaon pinaagi sa pagpaubos sa presyo sa pangunang pagkaon, samtang naghatag usab og dugang suporta ug sigurado nga merkado alang sa mga lokal nga mag-uuma sa probinsya. (RTB)
