OPISYAL nang gilusad ang LAAG Bohol Web App niadtong Hulyo 23 sa National Museum of the Philippines – Bohol, aron mas mapadali ug mas maseguro ang kalidad sa serbisyo sa turismo sa probinsya.
Gipasiugda kini sa Kagamhanan sa Probinsya pinaagi sa Bohol Provincial Tourism Office, ug gihimo sa Bohol Island State University (BISU) pinaagi sa pondo gikan sa DOST-PCIEERD. Kini nga plataporma mag-uban sa mga akreditadong giya, tag-iya sa sakyanan, ug mga serbisyo nga mas dali ma-access sa mga bisita.
Sumala sa project leader nga si Ivy Jane Asilo, ang LAAG nagsugod isip pagpalambo sa kahibalo sa pinulongan sa mga giya, apan karon nahimo nang komprehensibong sistema para sa tibuok turismo.
“Ang LAAG dili na lang bahin sa pinulongan—kini nahimong bahin na sa panginabuhian. Alang kini sa tanang nalambigit sa turismo,” pasabot ni Asilo.
Sa mensahe ni Gov. Aris Aumentado nga gidala ni Metodio Maraguinot Jr., gidayeg kini isip tulay sa kabilin ug sa modernong panahon. Gipakita usab ni Dr. Daryl Valdez ang mga gamit sa app, samtang ang mga opisyal sa BISU ug DOST nagpamatuod nga ang panukiduki gihimo alang sa tinuod nga kaayohan sa katawhan.
Ang app dili lang magpakita sa mga sikat nga lugar—kini magdala usab sa mga bisita sa mas lawom nga bahin sa Bohol isip UNESCO Global Geopark, uban sa iyang kabilin, kinaiyahan, ug malungtarong turismo. (RTB)
