MAGSAULOG ang tibuok Probinsya sa Bohol sa iyang ika-172 nga Adlaw sa Katukoran karong Hulyo 22, ubos sa tema nga “Sandugo sa Bohol: Celebrating Bonds, Celebrating Opportunities.”
Ang opisyal nga kasaulogan ipahigayon sa Bohol Cultural Center sugod alas 8:00 sa buntag, diin gipaabot ang pagtambong sa mga opisyal sa probinsiya ug lungsod, representante sa nasudnong gobyerno, ug ubang dinapit nga bisita.
Sugdan ang programa pinaagi sa Balaan nga Misa, sundan sa pormal nga pagdawat, prosesyon sa pagpasidungog sa mga bayaning Bol-anon, pagpasulod sa mga bandera, ug ecumenical prayer. Mohatag sa pagbukas nga mensahe si Vice Governor Nicanor Besas, samtang ang commemorative message ihatag ni Governor Aris Aumentado.
Usa sa pinaka-highlight mao ang pagpasundayag pag-usab sa Sandugo — ang makasaysayanong pagpahigop sa dugo tali ni Datu Sikatuna ug Miguel López de Legazpi niadtong 1565, nga nagpabiling simbolo sa panaghigalaay ug panaghiusa. Lakip usab sa programa ang mga pasundayag sa kultura, paghatag og pasidungog sa mga talagsaong Bol-anon, ug paniudto aron tapuson ang opisyal nga kalihokan.
Ang Hulyo 22 gisaulog matag tuig isip paghandum sa pagkatukod sa Bohol niadtong 1854 isip bulag nga probinsya gikan sa Sugbo. Kini gideklarar nga special non-working holiday sa tibuok probinsya pinaagi sa Republic Act No. 7683. (RTB)
