GIPAKUSGAN na karon ang mga pagpangandam alang sa gipaabot nga Sandugo sa Bohol 2026 Festival of Festivals Street Dancing ug Grand Showdown, nga ipahigayon karong Hulyo 26 sa CPG Complex dinhi sa siyudad. Kini giila nga labing dako nga kultural nga pasundayag sa Bohol UNESCO Global Geopark.
Gipahigayon ang katapusang koordinasyon nga tigom niadtong Hulyo 14 sa CPG Hall, ubos sa pagpangulo ni Bohol Center for Culture and Arts Development (CCAD) Head Emerson Pinos, ug gisuportahan sa Kagamhanang Probinsyal sa Bohol ubos ni Gob. Aris Aumentado. Gitambongan kini sa mga ahensya, LGU sa Tagbilaran, mga mosalmot nga lungsod, ug mga kauban sa kalihokan.
Gihisgutan ang seguridad, pagdumala sa trapiko, plano sa pagsira sa karsada, dapit sa pasundayag, ug ang saktong han-ay sa dagan sa programa.
Karong tuiga, siyam ka lungsod ang magtigi alang sa korona: Alburquerque, Loay, Maribojoc, Antequera, Valencia, Dimiao, Ubay, Catigbian, ug Talibon. Aron suportahan ang ilang pag-andam, naghatag ang probinsya og tag-₱1,000,000 nga subsidy alang sa matag partisipante. (RTB)
