MITUNGHA na ang kondisyon sa El Niño sa tropikal nga Pasipiko, hinungdan nga nagpagawas ang Philippine Atmospheric, Geophysical and Astronomical Services Administration (PAGASA) og El Niño Advisory No. 1 niadtong Hunyo 9, 2026.
Samtang misaka ngadto sa kapin sa 80 porsyento ang posibilidad nga mahimong usa ka hingpit nga El Niño episode.
Si Engr. Jhomer Eclarino, chief weather forecasting specialist sa PAGASA-Visayas, miingon nga ang naobserbahang relative sea surface temperature anomaly niabot na sa 0.5-degree Celsius nga sukdanan niadtong Mayo, nga maoy basehan sa bag-ong pagtuon sa ahensya sa pagdeklara sa presensya sa kondisyon sa El Niño.
“Kadaghanan sa mga climate model nagpakita nga adunay kapin sa 80 porsyentong posibilidad nga kini mahimong usa ka hingpit nga El Niño event, nga gilauman nga magpadayon hangtod sa sayong bahin sa 2027,” matud pa ni Eclarino.
Bisan pa sa pagsugod sa kondisyon sa El Niño, gipasabot ni Eclarino nga magpadayon gihapon ang pag-ulan sa nasud tungod sa habagat o southwest monsoon.
Ang mga dapit sa kasadpang bahin sa nasud gilauman nga makasinati og labaw sa normal nga gidaghanon sa ulan tungod sa nagpadayon nga habagat ug sa posibleng impluwensya sa mga bagyo nga mosulod sa Philippine Area of Responsibility (PAR).
Apan, iyang namatikdan nga sa dihang mas mobati na ang epekto sa El Niño, adunay pipila ka bahin sa nasud nga mahimong makasinati og ubos sa normal nga pag-ulan, nga posibleng mosangpot sa dry spell ug huwaw.
Miingon si Eclarino nga ang El Niño nagdala og hulga sa seguridad sa suplay sa tubig, produksiyon sa pagkaon ug suplay sa enerhiya, nga maoy hinungdan sa pagpalihok sa El Niño Task Group ug sa pagpatuman sa nagkadaiyang lakang sa pagpaminos sa epekto niini pinaagi sa mga hingtungdan nga ahensya sa gobyerno ug mga lokal nga kagamhanan.
Gidasig niya ang mga residente nga magtigom ug magtipig og tubig-ulan sa mga dram o sudlanan nga adunay taklob aron malikayan ang mga lamok ug mapakunhod ang risgo sa dengue.
Alang sa Hunyo, matud pa ni DOST-PAGASA Administrator Nathaniel T. Servando sa maong advisory, gilauman nga makasinati ang tibuok nasud og normal nga gidaghanon sa ulan, apan adunay mas dako nga posibilidad sa labaw sa normal nga pag-ulan sa kasadpang bahin sa Luzon. Usa ngadto sa duha ka bagyo usab ang gilauman nga mamugna o mosulod sa PAR ning bulana. (RTB)
