GIPASALIG ni Gobernador Erico Aristotle “Aris” Aumentado sa tanang Bol-anon nga dili angay mabalaka bisan gamay bahin sa giplanong pagtukod sa SM sa Bohol. Matod pa niya, gikompirmar kini mismo ni Hans Sy, chairman sa SM Prime, nga sigurado ug magpadayon gyud ang maong proyekto bisan pa sa mga hungihong ug kabalaka nga dili kini matuman.
Usa kini ka dakong maayong balita para sa probinsya, sumala sa gobernador, kay ang pag-abot sa SM magdala og daghang benepisyo: maghatag kini og daghang trabaho, higayon para sa mga negosyante, ug dakong tabang sa pagpalambo sa ekonomiya sa tibuok lalawigan.
“Mga igsuon kong Bol-anon, dili kita angay mabalaka bahin sa proyekto sa SM Bohol. Sumala ni Mr. Hans Sy, magpadayon ug matuman gyud ang maong proyekto. Kini usa ka maayong balita alang sa atong probinsya tungod kay makahatag kini og daghang oportunidad sa trabaho, negosyo, ug dugang kalamboan sa ekonomiya sa Bohol,” pahayag ni Aumentado.
Giawhag usab niya ang tanan nga magpabiling positibo ug suportahan ang mga proyekto nga makatabang sa pag-asenso sa Bohol. “Magpabilin kita nga positibo ug suportahan ang mga proyekto nga makatabang sa pagpalambo sa atong lalawigan. Padayon ang kalamboan sa Bohol,” dugang pa niya.
Giisip kini nga usa sa kinadak-ang pamuhunan nga gilauman nga magduso sa mas paspas nga pagtubo sa ekonomiya, ug makadani pa sa daghang ubang mga mamumuhunan nga mopahigayon og negosyo dinhi sa probinsya. (RTB)
