GIPADAYAG ug gipahibalo ni Board Member Balite Dedjay ang iyang dakong kabalaka bahin sa padayon nga pagtaas sa presyo sa pletehan sa mga barko ug mga sakyanan sa kadagatan, ug gihangyo ang katugbang nga komite nga himuon ang kinahanglanon nga pagtuon ug paghimog aksyon bahin niini nga isyu.
Sa iyang pakigpulong (Privilege Speech) atol sa sesyon kaganiha, matod pa ni Balite:
“Dugay na kining gikabalak-an sa atong katawhan – ang kanunay nga pagsaka sa presyo sa pletehan sa barko, transportasyon, ingon man sa mga palaliton nga gidala gikan sa lain-laing dapit. Sa miaging mga tuig, daghan na ang mga kausaban ug pagtaas nga gipatuman, apan ang pangutana sa kadaghanan: ‘Asa man padulong ug hangtod kanus-a kini magpadayon?’”
Gipasabot pa ni BM Dedjay Balite nga bisan pa man nga adunay pagtaas sa presyo sa lana ug uban pang galastuhan, kinahanglan gihapon nga masiguro nga ang pagtaas sa pletehan magpabilin nga tarong, makiangayon, ug dili makadaot sa kinabuhi ug bulsa sa mga lumulupyo.
“Gidawat namo nga adunay mga rason sama sa pagtaas sa presyo sa krudo ug uban pang galastuhan sa pagpadagan sa negosyo, apan kinahanglan usab nga hunahunaon nga kining tanan nga kausaban direkta nga masabtan ug mabati sa ordinaryong mga konsumidor o sunasakay, mga pamilya, mga trabahante, mga negosyante, ug mga lumulupyo nga nagasalig sa serbisyo publiko,” dugang pa niya.
Gipunting usab ni BM Balite nga ang serbisyo publiko dili lang yano nga negosyo, kondili usa ka dakong responsibilidad ug katungdanan. Ang paglihok ug pagserbisyo sa katawhan naglakip sa pagsiguro nga ang matag serbisyo luwas, barato, ug matarong, ug nga ang kagamhanan kanunay nga nagbantay aron dili mapahimuslan ang publiko.
Tungod niini, gisugyot ug gihangyo niya nga ipasa kini nga butang ngadto sa Committee on Public Utilities, aron himuon ang saktong pag-imbestigar, pagtuon, ug pagrepaso. Ang tumong mao ang pagpangita og paagi nga makabalanse ang interes sa mga negosyante ug sa kaayohan sa mga konsumidor, ilabi na karon nga namatikdan ang dakong pag-us-os sa presyo sa lana apan wala kini makita nga nisalamin o nahimong kaayohan sa presyo sa pletehan.
“Dili kini reklamo, kondili usa ka tinuod nga kabalaka. Nganong dili man mokunhod o moubos ang pletehan bisan pa man nga miubos na ang presyo sa lana?”
“Kinahanglan natong susihon kini ug sigurohon nga ang tanang kausaban adunay tarong nga basehan ug katarungan,” panapos ni Balite sa iyang pakigpulong. (RTB)
