ISIP kabahin sa mas dako ug mas bongga nga “Sandugo sa Bohol 2026 Celebration,” nagpahigayon og unang tigom ang Kagamhanang Probinsiyal sa Bohol (PGBh) ubos sa pagpangulo ni Gobernador Aris Aumentado kaniadtong Mayo 20 alang sa pagpangandam sa Sun Life 5150 Triathlon.
Gidumala ni Supervising Administrative Officer (SAO) Metodio “John” Maraguinot ang maong tigom isip representante sa gobernador, kauban sila si Melvin Salinasal ug GO-PAIRS Head EJ De Guzman, aron plantsahon ang mga detalye kauban ang nagkalain-laing ahensya sa gobyerno sama sa PDRRMO, Coast Guard, Bureau of Fire Protection, TaRSIER 117, ug mga opisyal sa lungsod sa Panglao.
Makasaysayanon kini nga tuig tungod kay gisaulog sa probinsya ang usa ka dekada nga pag-host sa Sun Life 5150 Triathlon, nga nagpasiugda sa napulo ka tuig nga lahutay, athletic excellence, ug lig-on nga panagtambayayong nga nagpalig-on sa Bohol isip nag-unang sports tourism destination.
Giisip kini nga ikatulong 5150 Triathlon Island Series nga gilangkuban sa Guimaras, Camiguin, Bohol, ug Samal. Gawas niini, dako ang pag-amping sa kagamhanan sa pagpahigayon sa lumba tungod kay nangandam usab ang Bohol alang sa revalidation sa prestihiyosong UNESCO Global Geopark designation niini karong tuiga, diin prayoridad gayod ang pagprotekta sa kalikupan ug luwas nga turismo.
Usa sa mga importanteng hisgutan sa tigom mao ang Panglao Municipal Ordinance No. 11, Series of 2025, diin giilisan ang “disruption fee” ngadto sa “environmental fee” ug hingpit nga gitangtang ang “participant fee” aron mas mahimong inclusive o bukas para sa tanan apan nagpabiling mapanalipdanon sa kalikupan.
Gitakda ang dako nga lumba karong Hulyo 10 hangtod 12, 2026, nga ipahigayon sa The Bellevue Resort sa Doljo, Panglao. Sa pagkakaron, anaa na sa 300 ka mga partisipante ang nagkumpirma sa ilang pagsalmot, apan gilauman nga mosaka pa kini ngadto sa 800 ka mga atleta sa mosunod nga pito ka semana sa dili pa ang maong kalihokan.
Tungod sa mga kabag-ohan sa panahon ug sa sulog sa dagat, seryoso usab nga gihisgutan ang pag-repaso sa mga ruta sa lumba, ilabi na sa swim segment o bahin sa paglangoy.
Magtigom pag-usab ang mga organizers ug mga opisyal karong Hunyo 3 aron masusi kini og maayo kauban ang DOST-PAGASA ug DENR. Kining tanan nga paningkamot nagpakita sa tinguha sa Bohol nga mopasundayag og world-class ug dungan niini, malungtaron ug responsable nga sporting event alang sa tibuok kalibutan. (RTB)
