GISUGDAN na ang pagtukod sa bag-ong Grand Summit Bohol sa Brgy. Doljo, Panglao, usa ka dakong tourism investment nga gilaoman makahatag og trabaho ug dugang kalihokan sa ekonomiya sa lalawigan.
Ang kapin 200 ka lawak nga luxury hotel proyekto nga gisuportahan sa Robinsons Land Corporation ug Robinsons Hotels and Resorts gilauman nga makamugna og daghang trabaho, makatabang sa mga lokal nga negosyo, ug makapalig-on sa Bohol isip usa sa top tourist destinations sa nasud.
Gihimo ang groundbreaking sa bag-ong luxury hotel karong buntag, May 20, 2026 didto sa Doljo, Panglao.
Matod ni Governor Aris Aumentado sa iyang mensahe atol sa kalihokan nga ang proyekto maoy lig-on nga timaan sa pagsalig sa mga mamumuhunan sa kusog nga pagtubo sa turismo ug ekonomiya sa Bohol.
Matod niya, makatabang usab ang hotel development sa pagpalihok sa ekonomiya sa Panglao ug mga silingang lugar pinaagi sa pagmugna og trabaho, pagtubo sa tourism-related businesses, ug dugang panginahanglan sa local hospitality industry.
Gihingusgan usab sa gobernador nga padayon ang paningkamot sa probinsya sa pagbalanse sa development ug pagpanalipod sa kinaiyahan isip unang UNESCO Global Geopark ug regenerative island destination sa Pilipinas.
Miingon si Aumentado nga ang proyekto nahiuyon sa Strategic Governance Roadmap sa probinsya nga naghatag prayoridad sa sustainable tourism, inclusive economic growth, environmental protection, ug human development.
Gitambongan sa mga opisyal sa gobyerno ug pribadong sektor ang groundbreaking ceremony lakip sila si JG Summit Chairman Emeritus James Go, Robinsons Land Corporation President and CEO Mybelle Aragon-Go-Bio, Robinsons Hotel and Resorts Senior Vice-President and Business Unit General Manager Barun Jolly, Robinsons Hotels and Resorts Vice-President Annalyn Yap, and Panglao Edgardo Arcay.
Sa higayon nga matapos na, gilaoman nga modawat ang Grand Summit Bohol og lokal ug langyaw nga mga turista nga makapalig-on pa sa Panglao isip tourism hub sa Central Visayas. (RTB)
