NAGDUSO si Board Member Jiselle Rae Villamor sa pagtukod og permanenteng satellite office sa Environmental Management Bureau (EMB) sa Bohol aron mapadali ang environmental services sa probinsya taliwala sa paspas nga pagtubo sa ekonomiya.
Atol sa privilege speech sa Sangguniang Panlalawigan, giingon ni Villamor nga ang nagkalapad nga sektor sa turismo, imprastraktura, agrikultura, negosyo, healthcare, ug real estate nanginahanglan og mas lig-on nga environmental regulation ug suporta.
Gipasiugda usab niya nga ang Bohol mao lamang ang UNESCO Global Geopark sa Pilipinas, busa adunay dakong responsibilidad sa pagpanalipod sa kinaiyahan.
Matod ni Villamor, daghang negosyo, LGUs, ug MSMEs ang naglisod sa pagkuha og environmental permits sama sa ECCs, discharge permits, ug hazardous waste permits.
Bisan og adunay EMB personnel sa PENRO-Bohol, kulang gihapon ang manpower aron maatiman ang nagkadaghang aplikasyon ug technical concerns sa probinsya.
Gipunting usab niya ang kalisod sa online permitting system diin daghang aplikante ang mapugos pa og balik-balik og submit sa requirements ug makig-coordinate sa EMB regional office sa Cebu.
Gikutlo ni Villamor ang kalampusan sa two-day “One-Stop Shop” initiative alang sa wood furniture MSMEs isip pamatuod nga andam mosunod ang mga Bol-anon sa environmental laws kon mas duol ug sayon ang serbisyo sa gobyerno.
Gihangyo niya ang DENR ug EMB Region VII nga magtukod og dedicated EMB satellite office o permitting and licensing unit sa Bohol.
Ang maong proposal girefer na sa Committee on Environment and Natural Resources Protection alang sa dugang aksyon. (RTB)
