GIKABALAK-AN karon sa mga climate experts ang bag-ong weather model data nga nagpakita og dako nga posibilidad sa pagkaporma sa usa ka “Super El Niño” sa ulahing bahin sa tuig 2026.
Base sa pagsusi ni Ben Noll, usa ka meteorologist, gipakita sa ECMWF data nga adunay hapit 100% nga tsansa sa maong phenomenon pag-abot sa Oktubre 2026, diin bana-banaan nga mosaka ang kainit sa central equatorial Pacific ngadto sa +2.7°C above average.
Ang maong sitwasyon giisip nga “Super El Niño” tungod sa molapas na kini sa normal nga threshold nga +0.5°C lamang, ug gilauman nga magpadayon ang pag-init hangtod sa Disyembre.
Tungod mas mainit na ang global climate background karon kumpara sa milabay nga mga dekada, ginalantaw nga mamahimong mas mobug-at ang epekto niini sa tibuok kalibutan.
Sa Pilipinas, ang pipila sa mga mamahimong epekto niini mao ang mas grabeng heatwaves, rekord nga kainit, ug grabeng hulaw sa pipila ka rehiyon nga moresulta sa kakuwang sa tubig ug pressure sa food supply ug agrikultura.
Bisan pa man kon kini usa pa ka forecast ug wala pa’y opisyal nga deklarasyon sa aktwal nga gikusgon niini, gidasig na sa mga climate agencies ang publiko, mga LGU, ug ang sektor sa agrikultura ug panglawas nga mangandam na og sayo. (RTB)
