VALENCIA, BOHOL – Malampusong gipahigayon ang “Operation Tuli: Surgical Mission 2” nga nakahatag og libre ug luwas nga serbisyo sa pagtuli sa mga kabataan sa nagkadaiyang barangay sa lungsod.
Sa unang hugna nga gipahigayon sa Barangay Anonang niadtong Abril 27, 2026, mikabat sa 48 ka kabataan ang nakabenepisyo. Gisundan kini sa Abril 28 sa Anoyon nga adunay 36 ka benepisyaryo, Abril 29 sa Magsaysay nga adunay 26, ug Abril 30 sa Valencia Astrodome nga adunay 57 ka kabataan.
Sa kinatibuk-an, niabot sa 167 ka kabataan ang natabangan, lakip ang usa (1) gikan sa Garcia Hernandez ug duha (2) gikan sa Dimiao.
Ang tanang kabarangayan sa Valencia ang naserbisyuhan. Daghang ginikanan ang nagpahayag og pasalamat tungod sa maong inisyatibo nga naghatag og libre ug luwas nga pagtuli alang sa ilang mga anak.
Personal nga mitambong si Mayor Neil Balite, Mayor sa Valencia, uban sa mga lokal nga opisyal isip pagpakita sa ilang lig-on nga suporta sa mga programang pangkahimsog sa komunidad.
Ang kalihokan gipasiugdahan sa Local Government Unit (LGU) Valencia uban sa pag-abag sa Department of Health Region 7 pinaagi ni Dr. Joshua Brillantes, Regional Director, ug sa Municipal Health Office nga gipangulohan ni Dr. Roseanne Erika A. Loquellano, Municipal Health Officer. Dako usab ang papel sa mga barangay officials sa Anonang ubos sa liderato ni Kapitan Nerio Rara; sa Anoyon ubos ni Kapitan Noel Balagot; ug sa Magsaysay ubos ni Kapitan Jimmy Tadlip.
Matod ni Mayor Neil Balite, “Ang maong programa kabahin sa atong padayon nga paningkamot sa paghatag og libre ug accessible nga serbisyong medikal sa atong katawhan, labi na sa atong kabataan. Nagpasalamat kita sa tanang nitabang aron malampuson kini nga kalihokan.”
Gipadayon sa lokal nga panggamhanan sa Valencia ang pagpalapad sa mga medical mission aron masiguro ang kahimsog ug kaayohan sa tanang residente.
