GIPAHIBALO ni Gobernador Aris Aumentado ang pagpalapad sa Special Program for the Employment of Students (SPES), usa ka hinungdanong programa sa Bohol Employment and Placement Office (BEPO) sa Provincial Government, kauban ang Department of Labor and Employment (DOLE).
Ang SPES usa ka programa nga nagtumong sa paghatag og kahigayonan sa mga kabatan-onan nga makatrabaho atol sa ilang bakasyon aron makatabang sa ilang pagtungha ug sa pinansyal nga panginahanglan sa ilang pamilya.
Matud pa ni Gobernador Aumentado, gipalapdan nila ang maong programa aron mas daghan pa nga mga kabatan-onan ang mahatagan og kahigayonan, ilabi na sa kasamtangang krisis nga giatubang karon.
Kini nga inisyatiba nagpakita sa pasalig sa probinsyal nga gobyerno sa pagsuporta sa edukasyon ug sa paghatag og trabaho sa mga estudyante.
Gipaabot sa Gobernador ang iyang dakong pasalamat sa BEPO ug sa DOLE sa ilang walay puas nga pagtinabangay ug dedikasyon sa pagpatuman sa maong programa nga dako og tabang sa mga kabatan-onan sa Bohol.
“Ang SPES usa ka programa sa Bohol Employment and Placement Office (BEPO) sa Provincial Government, kauban ang DOLE. Ato kini nga gipalapdan aron mas daghang kabatan-onan ang mahatagan og kahigayonan ilabina sa crisis nga atong giatubang karon. Daghang salamat BEPO ug DOLE!” pahayag ni Gobernador Aumentado.
Pinaagi niini, gilauman nga daghang mga estudyante ang makabenepisyo, makakuha og kasinatian sa trabaho, ug makatabang sa ilang kaugalingon ug sa ilang pamilya. (RTB)
