KULBA-HINAM ang manghitabo ugma pohon, Lunes, kay mao kining adlawa ang adlaw nga mahibaw-an na gyod kon kinsa sa mga Kongresista ang mo-botar og Yes -pabor sa impeachment – ug No – di pabor sa impeachment – ni VP Inday Sara.
Duna nay ubang mga kongresista nga klaro na kaayo nga misulti nga No ang ilang boto kay nagtuo sila nga mao kini ang husto nga boto ug maoy gikinahanglan sa nasod karong mga panahona.
Apan ang uban, nag-konsulta pa kuno sila sa ilang mga supporters ug loyalists kon unsa gyod ang ilang sentimento sa maong isyo.
Duna koy pangutana.
Unsaon man nimo pagkuha sa husto nga sentimento sa mga katawhan sa distrito, iphon ang ilang boto sa tanang mga lungsod unya ang kinadaghanan nga boto maoy tumanon?
Kon daghan ang Yes o No, mao ba kini ang husto nga boto?
* * *
Nganong migawas na man kining matod pa konsultasyon sa katawhan nga bale ika-duha na man kini nga botohay sa impeachment batok ni Inday Sara?
Sa miaging pag-pirma sa impeachment complaint, diha ba diay to gihimo nga konsultasyon sa wala pa sila mopirma?
* * *
Unsay kasagaran nga rason nga mo-pirma na lang kunohay sa impeachment complaint – mawala ang mga proyekto sa mga lain-laing lungsod sa distrito ug maapektohan ang mga benepisyo sa katawhan kay dili na man kini ihatag.
Mogawas nga sama sa “gi-bribe” ang mga kongresista nga kon mobotar gani og No, impas patatas ang ilang mga proyekto sa distrito.
Pasabot, duna na diay kondisyones ang paghatag og mga proyekto karon, dili na ang panginahanglan sa mga katawhan ang basehan?
Pasabot, gihimo nang instrumento ang kwarta sa katawhan alang sa pamolitika – aron lang ma-impeach ang Bise Presidente?
Unya mogawas sab nga imbes ang ilang trabaho unta legislation o pagpanday o pag-usab og mga balaod, trabaho na nila karon ang pagpangita og proyekto sa distrito nga unta trabaho man kini nga executive o trabaho sa mga mayor ug mga gobernador?
Diha gani toy kongresista sa una nga akong gi-live interview, ngutana ko og unsay iyang kalamposan isip representante sa maong distrito, deretso og tubag og nalibot na niya ang distrito og mga proyekto. Ako gitubag nga dili man na trabaho og kongresista, akong pangutana, unsay balaodnon alang sa imong distrito nga imong napalabang. Natuk-an oy kay base sa record, wala man gyod, nada, zilch. Ingon na lang siya nga co-author siya sa usa ka balaodnon, pasabot igo ra siya mi-pirma sa balaodnon nga gipalabang sa iyang kauban nga kongresista.
Pagkita bitaw namo human sa interview, perteng sukoa kay gipakaulawan kuno nako siya, hahahaha.
* * *
Anyway, we will be keeping watch on the political event tomorrow.
Kon mopirma silang 3 ka Bohol congressmen, whatever their vote is, dali ra kaayo mahibaw-an sa mga katawhan ang ilang boto. Kon mo-botar sila og Yes, unya makuha ang hustong gidaghanon, iduso na ang Articles of Impeachment sa senado aron adto mag-hearing kon i-convict ba o i-acquit si Inday Sara.
Kon ma-convicted, pasabot, matangtang siya isip bise-presidente unya duna pa gyod dugang silot nga perpetual disqualification to hold public office.
Pero kon ma-acquitted siya kay wala kaabot sa 16 ang Yes votes, impas patatas sab ang kaso nga impeachment batok kaniya.
Unsay mahitabo sa mga kongresista nga mibotar og Yes sa piniliay sa 2028? Dawaton pa kaha sila ni Inday Sara sa iyang grupo kon mo-balimbing sila?
Mao nay pangutana nga nag-tangag og dakong premyo.
* * *
Grabeng paldo ang usa ka mayor.
Dunay miagni kaniya nga mag-fund-raising didto sa Estados Unidos pero dili ipalabas nga fund-raising kay uwaw sab. Dali ra kaayo nakakita og bug-at nga rason – giimbitar sa mga lain-laing grupo sa mga katawhan sa maong lungsod nga tua na nanimuyo didto. Tuod man, lupad dayon kay libre god ang pamasahe kay official trip kunohay unya duna pa gyod daily allowance.
Asa ka ana Delfin?
Tuod man, gibisitahan gyod sa Mayor ang mga lain-laing grupo ug dali ra kaayo kini nga gisabwag sa pisbok sa Mayor, pagmatuod nga legit gyod ang iyang katuyoan.
Human sa pipila ka adlaw nga suroy-suroy, miuli na ang Mayor ug abtik kaayo kini nga mitaho nga malamposon ang iyang byahe.
Malamposon tuod, pero wala kini kaayo matuhog sa mga katawhan nga maoy migasto sa maong byahe.
Malamposon gyod tuod kay paldo man ang Mayor sa mga donations nga iyang nadawat – mga dollars ha – dili tag-pesos.
Unya donations unta pod to sa lungsod pero ahem, gihipos ra man diay tanan ni Mayor para sa iyang personal nga mga katuyoan.
Kinsay akong source – igsoon sa driver didto sa US of A.
Hayahaya noh?
