DILI na kinahanglan pa nga mopakita og negative RT-PCR test o antigen test result ang mga byahero nga bakunado gikan sa ubang nasud padulong sa syudad sa Tagbilaran.
Sumala pa nga si Mayor Baba Yap ning syudad misagop sa Inter-Agency Task Force (IATF) resolution no. 168 pag tangtang sa negative RT-PCR test requirement sa mga langyaw ug Filipino nga moabot sa nasud.
Lakip sa ipakita ang proof of vaccination sama sa Word Health Organization International Certificate of Vaccination ug Prophylaxis; VaxCertPH; national o state digital certificate o vaccination card gikan sa country of origin.
Kinahanglan sab adunay valid tickets sa ilang pagbalik sa ilang nasud o sa sunod nga destination; adunay passport nga balido og dili moubos sa unom ka bulan gikan sa pag abot sa Pilipinas ug giawhag nga mokuha og travel insurance alang sa COVID-19.
Sa mga langyaw nga wala pay booster shots, kinahanglan makapakita og RT-PCR test kuha sulod sa 48 ka oras o Antigen Test nga nakuha sulod sa 24 oras sa dili pa ang adlaw o oras sa paglarga gikan sa ilang gigikanan.
Ang mga fully vaccinated nga Filipino national nga nakakuha na pud og booster shots, dili na kinahanglan mopakita sa RT-PCR test o Antigen test result, gawas lang sa mga fully vaccinated nga walay booster shots.
Samtang ang wa pa mabakunahi, kinahanglan ang RT-PCR test o antigen test sa ilang paglarga. Inig abot sa airport ipaubos sa swab test ug dayon ikwarantina hangtud nga mogawas ang ilang resulta nga gikuha sa ika lima nga adlaw. (RTB)
