ANDAM na ang City Government sa Tagbilaran sa pagpahigayon sa Saulog Tagbilaran 2026 Street Dancing ug Ritual Showdown karong adlawa Domingo, Abril 26, 2026, isip sentrong kalihokan sa tinuig nga pista sa siyudad.
Sugdan ang selebrasyon alas 4:00 karong hapon pinaagi sa Street Dance Parade sa Plaza Rizal, diin 15 ka barangay ang mopakita sa ilang maanindor nga costumes, sayaw, ug drumbeats nga nagrepresentar sa kultura sa mga Tagbilaranon.
Mopadayon ang kalihokan sa Grand Ritual Showdown alas 6:00 sa gabii sa CPG Sports Complex, diin magkompetensya ang 15 ka barangay contingents alang sa kampiyonato.
Aron masiguro ang kahapsay ug kaluwasan, ipatuman ang road closures ug traffic rerouting. Sirad-an ang Carlos P. Garcia (CPG) Avenue gikan sa Cathedral padulong sa CPG Sports Complex sugod alas 4:00 sa hapon.
Gi-aghat ang mga motorista nga mogamit sa C. Gallares Street ug Remolador Street isip alternatibong ruta, tungod sa gipaabot nga grabeng trapiko sa palibot.
Ang Tagbilaran City Police Station ug ang City Disaster Risk Reduction and Management Office magpatuman sa higpit nga seguridad sa tibuok kalihokan.
Gipahimangno usab sa publiko nga gidili ang backpacks, payong, ug hait nga butang, ug dili pasudlon ang mga hubog o naa sa impluwensya sa ilegal nga substansya. Giaghat usab ang pag-atiman sa kaugalingon ug pagpabiling hydrated.
Libre ang pagsulod sa tanan nga kalihokan. Gidapit ang publiko nga motambong ug makigbahin sa makusog ug makasayaw nga selebrasyon sa kultura sa Tagbilaran. (RTB)
