GIPAHIBALO ni Governor Aris Aumentado ang pagpalig-on sa internasyonal nga kooperasyon human sa courtesy visit sa Hungarian Ambassador to the Philippines nga si H.E. Titanilla Tóth, diin gipasiugda ang umaabot nga agricultural training programs ug posibleng scholarship exchanges aron mapalambo ang agri-education sector sa Bohol.
Matod ni Aumentado, nagkasabot ang Provincial Government ug ang Hungarian University of Agriculture and Life Sciences (MATE University), nga girepresentahan ni Chancellor Prof. Csaba Gyuricza, sa pag-organisa og usa ka semana nga short-term training course sa Bohol karong Oktubre.
Ang maong programa magdala og mga eksperto ug faculty gikan sa Hungary aron ipaambit ang modernong teknolohiya ug best practices sa agrikultura ngadto sa lokal nga sektor.
Motambong sa training ang mga estudyante ug magtutudlo sa agrikultura gikan sa Bohol Island State University (BISU), mga lokal nga mag-uuma, ug technical personnel gikan sa Office of the Provincial Agriculturist (OPA).
Gipasiugda sa gobernador nga kabahin kini sa mas lapad nga paningkamot sa pagpalig-on sa agricultural development pinaagi sa global partnerships, ug lakip sa gihisgutan ang posibilidad sa educational exchanges sa Hungary pinaagi sa scholarship programs alang sa mga Boholano nga estudyante ug propesyonal.
Mitambong sa miting ang mga opisyal sa BISU nga gipangulohan ni University President Dr. Anthony Penaso, uban sa mga opisyal sa probinsya sa Bohol.
Nagpasalamat si Aumentado kang Ambassador Tóth ug sa Hungarian government sa ilang padayon nga suporta, ug nahinumduman nga una kining gihisgutan sa miaging pagbisita sa ambassador sa Bohol niadtong Pebrero 2026.
Gitan-aw sa provincial government nga ang maong partnership usa ka estratehikong lakang aron mapalambo ang kapasidad sa agrikultura, inobasyon, ug internasyonal nga koneksyon sa probinsya. (RTB)
