MATUD sa mga awtoridad radyo gihapon ang labing popular nga agianan sa komunikasyon alang sa publiko dinhi sa atong nasud karon. TV mao ang nagsunod. Daghan na usab kaayo ang naghupot og cellphone, ug daghang mga cellphone konektado na sa Internet ilabi na sa mga syudad.
Sa nangaging mga dekada 50, 60, ug bisan sa dekada 70 daghan pang mga balay nato ang adunay altar. Matag alas-sais sa gabii kasagaran kanato mag-ampo atubang sa mga altar sa atong mga panimalay kuyog ang tanang miyembro sa atong pamilya. Karong panahona nihit na kaayo ang mga ingon niining mga kahigayonan.
Kasagaran sa atong mga panimalay karon ang tv mao na ang mipuli sa lugar sa atong mga kanhi altar. Inig-ka-alas-sais sa gabii magtapok na ang mga miyembro sa pamilya atubangan sa tv aron pagtan-aw sa mga kinaham nga salida, mga kinaham nga teleserye, mga koreanovela ug uban pa.
Labing maayo gayud kung ibalik unta nato ang atong mga altar. Apan kung dili man nato mahimong ibalik ang mga altar sa atong mga panimalay, nindot unta kung ang atong mga tan-awon nga mga salida sa tv adunay mga pagtulun-an, dili lamang bahin sa mga pinatyanay, pinusilay, paseksihay o hinilakay.
Pipila sa mga salida sa telebisyon nga atong nakit-an nga adunay maayong impluwensya naglakip ning mosunod: Gikan sa Cebu Catholic Television Network kon CCTN (Channel 9) anaa ang Lusad diin ang mga makahuluganong wali ni Padre Jose Adonis Aquino atong makita ug madungog. Sa mao gihapong istasyon, CCTN, matag Domingo ato usab nga makita ang Men of Light diin daghan kitang makat-onan sa mga ispirituhanong kulokabildo ni Bishop Ambo David, Padre Deo Galang ug mga laygo. Kadtong mga panimalay nga adunay cable tv mahimo kanunay nga motan-aw sa mga salidang binase sa Ebanghelyo sa EWTN (Channel 56) kon Eternal Word Television Network.
Ang atong panultihon karong semanaha gikan kang Pope Francis: “Mas moangay pa kog Simbahan nga samaran, nasakit, ug hugaw tungod kay daghang mga pobre ang nisimba, kay sa simbahan nga dili baskog kay tambok tungod kay buhong sa mga donasyon sa mga dato”.
