GILAUMAN sa mga motorista ang usa ka dako ug sunod-sunod nga hugna sa pag-ubos sa presyo sa mga produkto sa petrolyo sa umaabot nga Martes.
Base sa datos gikan sa tibuok semana nga trading sa Mean of Platts Singapore (MOPS) nga mao ang gibasihan sa presyo sa lana sa Southeast Asia nakita ang dakong pag-ubos sa presyo sa world market nga gipaabot nga bation usab sa Pilipinas.
Sumala sa labing bag-ong banabana sa trading, ang mosunod mao ang gilauman nga rollback matag litro: Gasoline (RON 95): P4.349; Gasoline (RON 92): P3.679; Kerosene: P3.160; ug Diesel: P19.910.
Bisan pa man niining dako nga bana-bana sa rollback, ilabi na sa diesel, gipahinumdom sa mga eksperto sa industriya nga ang pinal nga presyo mahimo pang mausab.
Kini tungod sa gitawag nga market premium o ang dugang nga bayronon sa pagbiyahe (shipping costs), limitasyon sa suplay, ug ang panginahanglan sa rehiyon nga kinahanglan pang i-konsidera sa mga kompanya sa lana sa dili pa ipagawas ang pinal nga umento o usos.
Kini nga rollback giisip nga dakong kahupayan alang sa mga drayber sa pampublikong sakyanan ug mga konsumidor human sa sunod-sunod nga pagsaka sa presyo sa miaging mga semana.
Gipaabot nga ipahibalo sa mga lokal nga kompanya sa lana ang pinal nga kantidad sa rollback ugmang adlawa Lunes, nga epektibo sa adlawng Martes. (RTB)
