“ANG tubig kinabuhi.” Ug bahandi, matud pa sa panugilon.
Ang lungsod sa Dagohoy, Bohol nagpahigayon sa “Expansion and Upgrading of Waterworks System level III” project nga nagkantidad of P43.8 milyones. Lakip niini ang pagtukod sa dakong tangke ug pipeline ngadto sa kabarangayan.
Ang Level III nagpasabot nga ang linya sa mga tubo, puhon, padulong ngadto diretso sa kabalayan sa mga barangay nga kutayan niini.
Kining proyekto himoon sa ESR Construction and Development Corp. nga gipanag-iyahan ni Ms. Marlyn Nadala Revelo, kinsa atong kauban sa una sa Mindanao Students Orgaization (MinSor), Divine Wod College-Tagbilaran, diin kita ang nangulo niini isip president. Si Ms. Revelo, nga karon nagbasi sa Paadian City, usa ka native sa Carmen, Bohol, kansang amahan kanhi kagawad sa lungsod.
Dako kaayo kining kalamboan. Di lang kauhaw sa tubig sa tagsatagsang bubonlan, kon dili, kauhaw sa katawhan dinhi nga makatagamtam nga adunay eksaktong supply sa ilang mga gripo.
Swerte gyud kaayo kining 4th class town sa Dagohoy tungod niining proyekto. Ug dugang niana, kining lungsod maoy giila karon nga unang lungsod nga nakabugtaw sa kaugaligong water treatment facility, aron mas limpyo na ang tubig ngadto sa katawhan. Nahimo kini karong modelo kay gibisitahan sa mga opisyal sa Catigbian. Ug gusto ni Mayor Benjie Oliva nga ila kining awaton, puhon.
Ang proyekto sa panubig sa Dagohoy gisubhan niadtong Biyernes (Abril 17). Ug personally gitambongan nila ni Gob. Aris Aumentado ug Congw. Vanvan Aumentado, gawas kang Ms. Revelo. Si Mayor Moloy Apat ang nanguna sa kalihokan pinaagi pagbendisyon ni Padre Hilot sa project groundbreaking.
Ang akong pangindahay ug paglaum nga ang water treatment sa Dagohoy mahimong panig-ingnan sa tanang lungsod sa Bohol aron sa pagbaton ug paghatag sa hinlo nga gamit sa tubig bililhon.
Kon hinlo ang tubig, hinlo usab ang katawhan sa ilang pagsalig. Ug ang pagbugtaw sa mga ingon niini nga proyekto, nagtahan usab ang mga opisyal sa tinuod nilang tahas sa panerbisyo. (09284085238/ricobedencio@yahoo.com
