GILAUMAN ang usa ka mahinungdanong pag-ubos sa presyo sa lana sa mga gasoline station sa tibuok nasod sugod ugma.
Base sa upat ka adlaw nga trading sa Mean of Platts Singapore (MOPS), dakong rollback ang nagpaabot sa mga drayber ug motorista diin ang presyo sa Diesel posibleng moubos gikan sa ₱5.50 hangtod ₱6.50 matag litro. Samtang, sa Gasolina, gilauman ang gamay nga lihok sa presyo gikan sa walay kausaban (no adjustment) hangtod sa ₱1.00 nga rollback matag litro.
Kini nga dakong diskwento giingong epekto sa reaksyon sa merkado sa kalibutan human sa duha ka semana nga ceasefire o paghunong sa kagubot sa geopolitical nga aspeto.
Kung madayon kini, usa kini ka dako nga kahupayan sa bulsa sa mga konsumidor, ilabi na sa mga nagsalig sa diesel alang sa transportasyon ug panginabuhian.
Gipaabot nga ipahibalo ang pinal nga adjustment karong adlawng Lunes ug hingpit nga ipatuman sa adlawng Martes
.
PAGBALIK SA P60 NGA PRESYO, HANAP
LISOD na nga mobalik sa kaniadtong P60 matag litro ang presyo sa petrolyo sa nasod gumikan sa padayong tensyon sa Middle East ug ang nagkahuyang nga bili sa piso batok sa dolyar.
Segun sa report gikan sa Department of Energy (DOE) ug mga analysis sa industriya karong Abril 2026, ang presyo sa diesel nilapas na sa P160 hangtod P170 matag litro sa pipila ka bahin sa nasod, samtang ang gasolina nagpabilin sa kapin P100 matag litro human sa sunod-sunod nga “big-time price hike.”
Gibutyag ni Energy Secretary Sharon Garin nga bisan pa man sa mga diplomatikong lakang aron masiguro ang agianan sa lana sa Strait of Hormuz, ang global market prices nagpabiling taas tungod sa gasto sa insurance ug shipping nga apektado sa giyera.
Gikataho usab nga ang Pilipinas nakasinati og “energy emergency” diin ang suplay sa lana igo na lang sa 45 ka adlaw, hinungdan nga gilauman nga magpabiling mahal ang lana sa taas nga panahon ug layo na sa posibilidad nga moubos kini sa kaniadtong barato nga presyo. (RTB)
