GITUGUTAN na sa Commission on Higher Education (CHED) ang mga higher education institutions (HEIs) nga mobalhin ngadto sa online classes alang sa nahabiling bahin sa semestre. Kini nga lakang gihimo isip tubag sa nagpadayong krisis sa presyo sa lana nga nakaapekto sa sektor sa transportasyon ug ekonomiya sa nasod.
Sumala ni CHED Spokesperson Shirley Agrupis, kini nga polisiya usa ka temporaryo nga solusyon nga susama sa pamaagi nga gipatuman kaniadto sa kasagsagan sa COVID-19 pandemic.
Gipasabot ni Agrupis nga tumong niini nga mahatagan og higayon ang mga unibersidad nga maka-adjust samtang nag-atubang ang publiko sa sunod-sunod nga pagsaka sa presyo sa petrolyo.
Bisan pa niini, giklaro sa CHED nga adunay mga procedural nga kinahanglanon nga angay sundon sa mga unibersidad sa dili pa sila hingpit nga tugutan nga magpatuman og “pure distance learning.”
Kinahanglan gihapon nga masiguro nga andam ang teknolohiya ug sistema sa eskwelahan aron dili masakripisyo ang kalidad sa edukasyon sa mga tinun-an.
Gilauman nga dako kini og tabang sa mga magtutudlo ug mga estudyante, ilabi na sa pagdaginot sa gasto sa pletehan ug uban pang galastusan sa pagtungha sa personal. Pinaagi niini, maminusan ang epekto sa taas nga pletehan nga dala sa krisis sa lana samtang gipadayon ang pagtuon sulod sa panimalay. (RTB)
