PITO ka Bol-anong bag-ong doktor ang malampusong nakapasar sa March 2026 Physician Licensure Examination (PLE), lakip ang usa ka nakasulod sa Top 5 nationwide.
Ang nag-una sa mga passer mao si Dr. Ericson Lloren Luyun sa Barangay Cabunga-an, Jagna, nga nakakuha og 89.17 porsyento nga rating ug nahimong Top 5 sa nasud.
Siya usa ka graduate sa Cagayan State University sa Tuguegarao City.
Sumala sa partial nga listahan, ang uban pang mga Bol-anong nakapasar mao sila: Dr. Noreen Antoinette Balatero Jumawid, Dr. Anabeah Mahumot Apat, Dr. Loraine Marie Sevilla Oripaypay, Dr. Leah Mesha Dela Torre Figueras, Dr. Hyrah Jyle Otero Echavez, ug Dr. Elaisa Mae Mandalo Jamora.
Ang pipila sa mga bag-ong doktor anak sa mga kasamtangan ug kanhing mga lokal nga opisyal sa probinsya.
Samtang, gipadayag ni Bohol Governor Erico Aristotle Aumentado ang iyang mainitong pagtimbaya sa mga passer, nga iyang gihulagway isip bunga sa ilang paningkamot, sakripisyo, ug dedikasyon sa pagtuon.
Giingon sa gobernador nga ang kalampusan sa mga Bol-anong doktor usa ka dakong garbo sa probinsya ug mahimong inspirasyon sa kabatan-onan nga magpadayon sa ilang mga pangandoy.
Sumala sa Professional Regulation Commission, mokabat sa 1,954 sa 2,781 ka examinees ang nakapasar sa March 2026 PLE, nga adunay 70.26 porsyento nga passing rate sa tibuok nasud. (RTB)
